ცნობილი ქართველი ქუჩის მხატვრის, გიორგი გაგოშიძის, იგივე გაგოშას სტენსილებს თბილისში ბევრ ადგილას შეხვდები. ხელოვანი საკუთარი ნამუშევრებით ქვეყანაში მიმდინარე პრობლემებს ძალიან ხშირად ეხმაურება და გამონაკლისი არც 5 ივლისია.

First European (პირველი ევროპელი) — ასე დაასათაურა ავტორმა თავისი ახალი ნამუშევარი, რომელიც 5 ივლისს ძალადობრივი ჯგუფების მიერ მედიის წარმომადგენლებზე განხორციელებულ თავდასხმას ეხმაურება. ნამუშევარში "პირველი ევროპელი", რომელმაც ევროკავშირის დახეული დროშა ტანზე შემოიხვია, კამერას ლეწავს.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. მათ შორის იყო TV პირველის ოპერატორი ალექსანდრე ლაშქარავა.ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და შემდეგ სახლში გაეწერა. ალექსანდრე ლაშქარავა 11 ივლისს დედამ გარდაცვლილი იპოვა.

მედიის დიდი ნაწილი, არასამთავრობო ორგანიზაციები და საზოგადოება ლაშქარავას გარდაცვალებაზე პასუხისმგებლობას ხელისუფლებას აკისრებს. 11 და 12 ივლისს, პარლამენტის შენობასთან პრემიერმინისტრის გადადგომისა მოთხოვნით აქციები გაიმართა. ამ აქციებზე ჟურნალისტები კამერების წინ, ტრიბუნასთან იდგნენ და კოლეგის გარდაცვალების ფაქტის გამჭვირვალედ და დროულად გამოძიებას მოითხოვდნენ.

ამავე თემაზე: