ქიბარ ხალვაშის განცხადებით, იგი სტრასბურგში მისი უფლებების დასაცავად ჩავიდა. ამის შესახებ, მან რუსთავი 2-ის კორესპონდენტთან ისაუბრა. ხალვაშის განცხადებით, იგი აპირებს სასამართლოს წერილი ჩააბაროს, სადაც რუსთავი 2-ის საქმეში, მესამე მხარედ ჩართვას ითხოვს:

"ვითხოვთ, რომ მესამე მხარედ ჩაგვრთონ. სახელმწიფოს პარალელურად არა, ჩემი პირადი უფლებების დასაცავად მოვედი, ქონებრივი უფლებების და ყველაფრის. მეორედ ვარ აქ მოსული, პირველადაც სააკაშვილის გამო, როდესაც ლტოლვილი ვიყავი და ვიდევნებოდი და დღეს მეორედ ვარ მოსული.

სტრასბურგის გადაწყვეტილებას არ ვაკრიტიკებ, არავითარი გადაწყვეტილება არ ყოფილა, შეაჩერეს უბრალოდ, მივესალმები მეტი არაფერი. რაც აქამდე გაუკეთებია იმას გააკეთებს სტრასბურგი, გამარჯვება რა შუაშია, ესენი არ ადგენენ გამარჯვებულს და დამარცხებულს. მე მხარე არ ვარ, მე ჩემი უფლებების დასაცავად მოვედი. წერილი არის რომ მე მომისმინონ, რომ მეც მართალი ვარ ამ საქმეში. რუსთავი 2-სა და სახელმწიფოს შორის არის დავა, შეიძლება ჩემი უფლება დააზიანოს, ამ პირადი უფლების დასაცავად მოვედი".

სტრასბურგის სასამართლოში ქიბარ ხალვაში და მისი ადვოკატი პაატა სალია, ცოტა ხნის წინ მივიდნენ.

რუსთავი 2-ის საქმესთან დაკავშირებით უზენაესი სასამართლოს დიდი პალატის მიერ გამოტანილი გადაწყვეტილების მეორე დღესვე, სტრასბურგის ადამიანის უფლებათა სასამართლომ ამ გადაწყვეტილების აღსრულება შეაჩერა.