შინაგან საქმეთა მინისტრი, ვახტანგ გომელაური ფიქრობს, რომ მისი უწყება მოძალადეებს მწვანე შუქს არ უნთებს. ამის შესახებ მან მაშინ განაცხადა, როცა ძალადობრივი ჯგუფების მუქარის გამო ჩაშლილი აქციის შესახებ მედიას პასუხობდა.

ჟურანლისტის კითხვაზე, ნიშნავს თუ არა ეს, რომ ადამიანებს არ უნდა ქონდეთ დაცულობის განცდა, როცა ვიღაც გვაიძულებს, რომ ჩაიშალოს აქცია და არის თუ არა ეს მწვანე შუქის ანთება მოძალადე ჯგუფებისთვის, გომელაური თავადაც კითხვით პასუხობს: "და, უკაცრავად, მწვანე შუქის ანთება, ვინ უნთებს მწვანე შუქს? გამოძიება დავიწყეთ, დაკითხვაზე დავიბარეთ ხვალ და მწვანე შუქის ანთება რას ნიშნავს?"

ჟურნალისტსა და მინისტრს შორის საუბარი ასე წარიმართა:

ჟურნალისტი: ის, რომ ძალადობით და მუქარით შეიძლება ჩააშლევინონ ადამიანებს აქცია.

გომელაური: გასაგებია, მაგრამ მწვანე შუქს უნთობს ვიღაცა რაღაცა ხო...

ჟურნალისტი: სახელმწიფო იგივე, შინაგან საქმეთა სამინისტრო...

გომელაური: და რა ქმედება იყო შინაგან საქმეთა სამინისტროსი, რომელიც მწვანე შუქად აღიქმება, შეგიძლიათ მითხრათ?

ჟურნალისტი: ანუ როგორც მივხვდი აპირებთ რომ ეს ადამიანები დააკავოთ, თუ გამოიკვეთება დანაშაულებრივი ნიშნები.

გომელაური: რა თქმა უნდა, მაგას მაგას მე არა, კანონი აკავებს და მაგას მე არ ვწყვეტ დავაკავო თუ არა, კანონი წყვეტს, პროკურატურა და სასამართლო.

შინაგან საქმეთა სამინისტრომ ძალადობრივი ჯგუფების მიერ აქტივისტების მიმართ მუქარაძე გამოძიება დაიწყო. კერძოდ, გუშინ, 8 ივლისს ალტ-ინფოს ჩატში ძალადობრივი ჯგუფები აქტივისტებს სიცოცხლის მოსპობით და ფიზიკური ანგარიშსწორებით ემუქრებოდნენ იმის გამო, რომ მათ მიერ პარლამენტთან დადგმული ჯვრის აღების მოთხოვნით აქციის გამართვას აპირებდნენ.

ამ ძალადობრივი მოწოდებების შესახებ On.ge-მ შინაგან საქმეთა სამინისტროს გუშინ აცნობა და ცდილობდა გარკვევას, დაიწყებოდა თუ არა გამოძიება. უწყებიდან ამ დრომდე არ მოგვაწოდეს ინფორმაცია და გამოძების დაწყების შესახებ მინისტრის კომენტარიდან გავიგეთ.

გომელაურმა განაცხადა, რომ მიმოწერებიდან გამომდინარე რამდენიმე პირი გამოკითხვაზე დაიბარეს, რაც შეეხება დაკავების საკითხს, მისი თქმით, ამას პროკურატურა და სასამარლო გადაწყვეტს.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.