ძალადობრივი მოწოდებებისა და სიცოცხლის მოსპობის მუქარის გამო ხვალ პარლამენტთან დაგეგმილი აქცია-პერფორმანსი გაუქმდა. აქციის ორგანიზატორებს "სახელმწიფოს პანაშვიდი" ჰქონდათ დაანონსებული და ძალადობრივი ჯგუფების მიერ პარლამენტთან აღმართულ ჯვართან ყვავილების მიტანას აპირებდნენ, ასევე, უნდა მოეთხოვათ ჯვრის აღება.

მას შემდეგ, რაც ეს ინფორმაცია გავრცელდა, ჰომოფობიური, ქსენოფობიური და პრორუსული ალტ-ინფოს ტელეგრამ არხში ძალადობის შემცველი მოწოდებები გავრცელდა. ალტ-ინფოს გამომწერები ფიზიკურ ანგარიშსწორებას და თავდასხმას აანონსებდნენ და აქტივისტებს სიცოცხლის მოსპობით ემუქრებოდნენ. აღნიშნული ინფორმაცია On.ge-მ შსს-ს მიაწოდა და ელოდება პასუხს, დაიწყება თუ არა გამოძიება.

როგორც აქციის ერთ-ერთმა ორგანიზატორმა განაცხადა, ღონისძიების გაუქმების მიზეზი ის გახდა, რომ ქვეყანაში აზრის გამოხატვა სასიცოცხლო საფრთხეებს შეიცავს.

ჯვარი ძალადობრივმა ჯგუფებმა და საპატრიარქოს სასულიერო პირებმა 5 ივლისს აღმართეს.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.