ევროპარლამენტარი და ევროპის სახალხო პარტიის ბლოკის წევრი რასა იუკნევიჩიანეს განცხადებით, ეჭვგარეშეა, რომ თბილისში განვითარებული ძალადობრივი მოვლენების უკან კრემლი დგას. ფორმულას ეთერში მან აღნიშნა, რომ საქართველოში მიმდინარე პროცესები აშფოთებთ.

"ძალიან ცუდი ამბები მოგვივიდა ძალადობის შესახებ საქართველოდან. ყოველთვის ძალიან ცუდია ეს ამბები თქვენი მეგობრებისთვის საქართველოში. რაც მოხდა ამ დღეებში ნამდვილად არ არის კარგი ახალი ამბავი საქართველოსთვის და ვერ დააახლოვებს ეს საქართველოს ევროკავშირთან.

უნდა ვაღიარო, რომ ჩემს ქვეყანაში, ლიეტუვაში, მიუხედევად იმისა, რომ ევროკავშირის წევრები ვართ, ზოგჯერ გვესმის დისკუსიები და არის დემონსტრაციებიც ამ თემასთან დაკავშირებით, ჩვენს პარლამენტს სურდა მიეღო კანონი, ჩვენთან ასევე დაძაბული დემონსტრაციები იყო, მაგრამ საქართველოში რაც მოხდა, განსაკუთრებით გვაშფოთებს. ეს არის ძალადობა, სიძულვილის ენა და სიძულვილი.

მე ეჭვიც არ მაქვს, რომ კრემლი დგას ამ საკითხების უკან. მათთვის ე.წ. ოჯახის საკითხები ერთ-ერთი ინსტრუმენტია, რომ შეჩერდეს ისეთი ქვეყნების [წინსვლა], როგორიცაა საქართველო, უკრაინა, მოლდოვაა. განსაკუთრებით ეხება ამ ქვეყნებს, რადგან ეს არის მართლმადიდებელი ქვეყნები და როგორც კრემლი აცხადებს, ახლოს არის რწმენით მათთან და ისინი ცდილობენ ამ ინსტრუმენტის გამოყენებას ამ ქვეყნების წინააღმდეგ, რომელთაც სურთ იმ გზაზე იარონ, რომელზეც ჩემი ქვეყანა დგას", — განაცხადა მან. [ფორმულას თარგმანი]

მანვე აღნიშნა, რომ ყურადღებით აკვირდებიან ხელისუფლების მოქმედებებს. იუკნევიჩიანეს თქმით, მთავრობამ საკმარისი არ გააკეთა რომ შეეჩერებინა ძალადობა და დაეგმო ის ჯგუფები, რომლებიც ძალადობდნენ სხვებზე. მისივე თქმით, ფიქრობს, რომ ისინი ცდილობენ ეს გამოიყენონ არჩევნებამდე, რაც შემაშფოთებელია.

ევროპარლამენტარმა კითხვის პასუხად განაცხადა, რომ სურთ სჯეროდეთ საქართველოს გაცხადებული ევრო-ატლანტიკური კურსის და იმედს იტოვებს, რომ მთავრობა აღმოაჩენს თავში საკმარის პოლიტიკურ ნებას, რომ 2024-ში წევრობის განაცხადის პირობა აღასრულოს. მისი თქმით, მხოლოდ დაპირება საკმარისი არ არის და საჭიროა "იმოქმედო ისე, როგორც ევროპელმა".

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.