მოძალადე, რომელიც ჟურნალისტებს მიზანმიმართულად ეჯახებოდა მოპედით ამტკიცებს, რომ "ტრანსპორტმა უმტყუნა" და არავის დაზიანებას არ აპირებდა. სასამართლოზე სიტყვით გამოსვლისას მან თქვა, რომ "მოტოციკლეტი გაექცა" და ვერ შეაკავა.

სადაც ჟურნალისტებში შევვარდი ჩემი მიზანი მათი დაზიანება არ იყო.

"მივდიოდი იმისთვის, რომ მე მოვკარი ჩემ მოძღვარს თვალი და მინდოდა, რომ ჩემი პატივისცემა გამომეხატა მისთვის და პური მიმეტანა. მივდიოდი პურის მოსატანად [...]

"გამექცა მოტოციკლი, რომ გაეშვა მოტოციკლეტი "ტორმუზის" მოშვებისას, მოტოციკლეტი გამეშვა იმიტომ, რომ გაზიც გაიჭედა, მაღალი გაზის მიცემისას. ვიგინებოდი და ვყვიროდი, მივხვდი, რომ ვეღარ ვაჩერებდი, გამეჭედა. იქ პატრულმა დამიკავა, მაგრამ ისე მოხდა, რომ მაინც შევარდა იქ.

ამ შევარდნისას რატომღაც ერთ-ერთი ოპერატორი, არ ვიცი რომელი ტელევიზიის იყო წიხლებით შემომახტა მკერდზე, იმიტომ, რომ ისევ გაზს მივაწექი, იქნებ აიშვას-თქო და იფიქრა, რომ ისევ უნდა დავჯახებოდი. გადავწყვიტე ასეთი რამ მექნა, რომ წრე დამერტყა და ვინმეს არ დავჯახებოდი", — განაცხადა მან.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დაკავებულების შესახებ ინფორმაცია დღის ბოლოს და მომდევნო დღეებში გავრცელდა.

6 ივლისის ძალადობის გასაპროტესტებლად მდუმარე აქცია გაიმართა, სადაც მოძალადეები მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. პოლიცია მოძალადეებს აკავებდა, თუმცა საღამოს, სამართალდამცავებმა აქციის მონაწილეები და ჟურნალისტები ტერიტორიიდან გაიყვანა და მოძალადე ჯგუფები რუსთაველზე შეუშვა. მათ მეორედ ჩამოგლიჯეს და დაწვეს ევროკავშირის დროშა.

ამ ძალადობრივი მოვლენების გამო სამოქალაქო საზოგადოებისა და ოპოზიციის ნაწილს მიაჩნია, რომ შინაგან საქმეთა მინისტრის პასუხისმგებლობის საკითხი უნდა დადგეს, რადგან მან ვერ უზრუნველყო მშვიდობიანი მოქალაქეების და ჟურნალისტების უსაფრთხოების დაცვა.