ტელეკომპანია იმედის გენერალური დირექტორი შეიცვალა. არხის განცხადებით, ეს პოზიცია ნიკა ლალიაშვილის ნაცვლად, მაკა ლომიძემ დაიკავა. ლალიაშვილმა კი არხის აღმასრულებელი დირექტორის თანამდებობაზე გადაინაცვლა.

ტელეკომპანიის განცხადებით, ახალი დირექტორი თანამშრომლებს დღეს ოფიციალურად წარუდგინეს.

"მაკა ლომიძეს სხვადასხვა ტელევიზიაში მენეჯერის პოზიციაზე მუშაობის 19-წლიანი გამოცდილება აქვს. ის არხის მართვასა და მისი პოლიტიკის განსაზღვრას უკვე დღეიდან შეუდგა. [...]

ტელეიმედი ახალი სატელევიზო სეზონისთვის უკვე ემზადება. სატელევიზო ბადეში სექტემბრიდან ბევრი ახალი გასართობი და უახლესი ფორმატის საზოგადოებრივ-პოლიტიკური გადაცემა ჩაეშვება", — ვკითხულობთ განცხადებაში.

ლალიაშვილი იმედის დირექტორი 2020 წელს გახდა. მას ეკუთვნის აგვისტოს ომზე გადაღებული ფილმი "ჩვენ მშვიდობით მოვიგებთ სხვის დაწყებულ ომს", რომელიც კრიტიკის საგანი გახდა. მედიაჩეკერმა მაშინვე განაცხადა, რომ ფილმში ადგილი ჰქონდა მნიშვნელოვანი ფაქტების მიჩქმალვას, მანიპულაციას და არაზუსტი ინფორმაციის გავრცელებას. ამ ფილმის "ძირითად ხაზს" ტელეკომპანიის ათეულობით თანამშრომელი გაემიჯნა.