ბელარუსული გამოცემა TUT.BY-ის ყოფილი გუნდი ახალ მედია Zerkalo.io დააფუძნა. "როცა ქვეყანაში დამოუკიდებელი მედია ნაკლებია, ახალი უნდა დაფუძნდეს", — წერენ გუნდის წევრები.

რაც შეეხება TUT.BY-ის სოციალურ ქსელებს, მათ უბრალოდ სახელი გადაარქვეს და მკითხველს ინფორმაციას Zerkalo.io-ს სახელით აწვდიან.

როგორც მედიის წარმომადგენლები ამბობენ, ისინი გააშუქებენ სოციალურ სფეროს, პოლიტიკას, ეკონომიკისა და ანალიტიკას. მათივე თქმით, სპორტისა და კულტურის ამბებსაც მოიცავენ, თუმცა ნაკლებ მასშტაბში.

"Zerkalo.io დაასრულებს თავის არსებობას იმ დღეს, როდესაც TUT.BY-ს ბელარუსში მუშაობის სრულფასოვნად, ლეგალურად გაგრძელება შეეძლება, პუბლიკაციების მთელი არქივით. როდის მოხდება ეს, ჩვენ არ ვიცით", — ამბობენ Zerkalo.io-ს გუნდის წევრები.

ყველაზე დიდი დამოუკიდებელი ინტერნეტ მედიის, TUT.BY-ის ოფისი ბელარუსში ხელისუფლებამ 2021 წლის 18 მაისს დალუქა, დააკავეს ყველა, ვინც რედაქციაში იმყოფებოდა და დაბლოკეს საიტზე შესვლა.

15 ადამიანი, TUT.BY-ს ამჟამინდელი და ყოფილი თანამშრომლები კვლავ პატიმრობაში არიან. როგორც სახელმწიფო კონტროლის კომიტეტში განაცხადეს, TUT.BY-ის ოფიციალური პირების მიმართ სისხლის სამართლის საქმეა აღძრული. საუბარია სისხლის სამართლის კოდექსის 243-ე მუხლის მე-2 ნაწილზე, რაც განსაკუთრებით დიდი მასშტაბით გადასახადებისა და გადასახადების გადაუხდელობისგან თავის აცილებას გულისხმობს.

ასევე, პორტალის პროდუქციის ექსტრემისტულად აღიარების პროცესი დაიწყო. რედაქციის უმეტესი ნაწილი იძულებული გახდა წასულიყო. ისინი, ვინც ამჟამად Zerkalo.io-ზე მუშაობენ, ბელარუსის ფარგლებს გარეთ იმყოფებიან. მთელი ამ ხნის განმავლობაში, პორტალის სიახლეები მხოლოდ მედიის ოფიციალურ ანგარიშებში — სოციალურ ქსელებში და მესენჯერებში ვრცელდება.

Yandex.Metrica-ს თანახმად, TUT.BY-ის დღეში, საშუალოდ 1,8 მილიონი უნიკალური ვიზიტორი სტუმრობდა.