საქართველოს ჟურნალისტური ქარტიის აღმასრულებელი დირექტორი, ნატა ძველიშვილი ფიქრობს, რომ საქართველოს პრემიერ-მინისტრი, გიორგი კვირიაშვილი საქართველოში მედიაომბუდსმენის ინსტიტუტის შექმნაში უცხოელი ექსპერტების მიერ კვლევებისა და მონიტორინგის ჩატარებას და რეკომენდაციების შემუშავებას გულისხმობდა.

„მრჩებოდა შთაბეჭდილება, რომ პრემიერ-მინისტრს არ ჰქონდა გააზრებული რა ფუნქცია აქვს პრესის ომბუდსმენს. ის უბრალოდ საუბრობდა იმაზე, რომ საჭიროა უცხოელი ექსპერტების ჩამოყვანა, რომელიც შეისწავლიან საქართველოში არსებულ მედიაგარემოს, დადებენ რეკომენდაციებს, თუ როგორ უნდა გამოვიდეს ქვეყანა მდგომარეობიდან,“ - აღნიშნა ძველიშვილმა პრემიერ-მინისტრის ინიციატივაზე.

მისი თქმით, დღევანდელ შეხვედრაზე, რომელიც პრემიერ-მინისტრის ინიციატივით შედგა, საუბარი შეეხო ტელეკომპანია რუსთავი 2-ის საქმესაც. ძველიშვილის აზრით, პრემიერ-მინისტრმა სცადა შეხვედრის მონაწილეები დაერწმუნებინა, რომ ტელეკომპანია რუსთავი 2-ის ირგვლივ სასამართლო დავა საკუთრებასთანაა დაკავშირებული.