იურისტი, პარტია ლელოს ერთ-ერთი ლიდერი, კახა კოჟორიძე 5 ივლისს, ჰომოფობიური ჯგუფების მიერ ორგანიზებულ აქციასა და ძალადობის ფაქტებს ეხმაურება და აცხადებს, რომ ამით "სტარტი აიღო ოცნების წინასაარჩევნო კამპანიამ".

"პოლიტიკური მესიჯები ტრადიციულად მარტივად დაალაგეს: პრაიდს მხარს უჭერს ოპოზიცია; კონტრაქციას მხარს უჭერს ოცნება, ამიტომ, ხმა მიეცით ოცნებას!

ოცნებისთვის მთავარია 5 ივლისს წინასაარჩევნოდ იხეირეს თუ არა. მერე რა, რომ ამ პოლიტიკური სცენარის გათამაშებაში "ცოტა სისხლი(ც)" დაიღვარა, ჟურნალისტების ცემეს, აქტივისტებს ცემეს, სრულიად შემთხვევითი ადამიანებს ცემეს, კონსტიტუცია და კანონები სასაცილოდ აიგდეს, დასავლეთი გარყვნილად გამოიყვანეს, ჩრდილოეთი — ტრადიციების მცველად, პოლიციას მოწმის როლი მისცეს, მღვდელს — მოძალადის, ხოლო სახელმწიფოს — მკვდრის ...", — წერს კოჟორიძე საკუთარ ფეისბუქგვერდზე.

ჰომოფობიური და ძალადობრივი ჯგუფების კონტრაქციაზე მედიის 50-ზე მეტი წარმომადგენელი დაშავდა. მათ თავს ძალადობრივი ჯგუფები დაესხნენ და ტექნიკაც დაუზიანეს. ჟურნალისტების ნაწილი მძიმე დაზიანებებით საავადმყოფოშია გადაყვანილი.

თბილისი პრაიდის კვირეული დღეს, 5 ივლისს ღირსების მარშით უნდა დასრულებულიყო, თუმცა თბილისი პრაიდმა განცხადება გაავრცელა და თქვა, რომ ღირსების მარში სოლიდარობისთვის დღეს აღარ ჩატარდება. აქამდე კვირეულის ფარგლებში კინოჩვენება და ფესტივალი ჩატარდა, რომლის ჩაშლა ჰომოფობებმა სცადეს, თუმცა არ გამოუვიდათ. ორივე შემთხვევაში პერიმეტრს პოლიცია იცავდა.

5 ივლისს ჰომოფობიური ჯგუფები პარლამენტის წინ, ქაშუეთის ეკლესიასთან და რუსთაველის თეატრთან შეიკრიბნენ და იმუქრებოდნენ, რომ ღირსების მარშის ჩატარებას არ დაუშვებენ.

ამ კონტრაქციის მონაწილეები და ორგანიზატორები არიან: საპატრიარქო, მართლმადიდებელ მშობელთა კავშირი, პრორუსული ალტ-ინფო და სხვა ძალადობრივი ჯგუფები. გარდა ამისა, ეკლესიის ორგანიზებით შეკრებაზე მიიყვანეს ბავშვებიც. საპატრიარქოს ამ განცხადების გამო აკრიტიკებენ არასამთავრობო ორგანიზაციები და თბილისი პრაიდის ორგანიზატორები. ისინი ეკლესიას ძალადობის წახალისებაში ადანაშაულებენ.

პრაიდს მხარდაჭერა გამოუცხადა საქართველოში აკრედიტებულმა არაერთმა საელჩომ, ასევე პარტნიორი ქვეყნების პოლიტიკოსებმა — კონგრესმენებმა და ევროპარლამენტარებმა. ასევე, პრაიდს მხარს უჭერენ სხვადასხვა ოპოზიციური პარტიის წარმომადგენელი პოლიტიკოსები. თუმცა, პრაიდს არ აქვს მმართველი გუნდის მხარდაჭერა. მათი ლიდერები ჰომოფობიურ და ძალადობის წამხალისებელ განცხადებებს ავრცელებენ და ამბობენ, რომ ღირსების მარშის ჩატარება მიზანშეწონილი არ არის.