ქართველი მომღერალი ირმა სოხაძე პრაიდის კვირეულის გარშემო არსებულ დაძაბულობაზე საუბრობს და ამბობს, რომ ძალადობის წინააღმდეგია. ამის შესახებ, ხელოვანმა ტელეკომპანია ფორმულას გადაცემა კომენტარში განაცხადა.

ირმა სოხაძე ამბობს, რომ იმის მიუხედავად, რომ კონსერვატიულ ოჯახში გაიზარდა, განსხვავებულ ადამიანებს პატივს ბავშვობიდან სცემდა:

"ბავშვობიდან ვიცოდი, რომ ყველა ჩემნაირი არ შეიძლება იყოს და საშინლად მოსაწყენი იქნება, ყველა რომ ერთნაირი ვიყოთ და ჩვენგან განსხვავებულის პატივისცემა, მიღება და მიმღებლობა კი არა, პატივისცემა, აბსოლუტურად თანასწორ მდგომარეობაში ჩაყენება... ბევრი მათგანი ჩვენზე ნიჭიერია, ბევრი მათგანი ჩვენზე განათლებულია, რას ნიშნავს ეს არ მივიღოთ?!"

მომღერალი საზოგადოებას მოუწოდებს, რომ პრაიდის კვირეულის ფარგლებში ძალადობის მხარეს არ დადგნენ:

"უბრალოდ მინდა ვთხოვო უმრავლესობას, რომლის წევრი ვარ მეც, ყველა პარამეტრით, რომ ვიყოთ უფრო [...] ლაღები, თავისუფლები, ნუ ვიძაბებით, ნურავიზე ვძალადობთ, ნუ ვესვრით ნურც კვერცხს, ნურც პამიდორს, ნურც ტყვიას და ქვას ხო. არ ვესროლოთ არავის. ის ასეთია, ჩვენ ასეთი ვართ, ეგ არ იძლევა საფუძველს, რომ ჩვენ ერთმანეთს ტაბურეტკებითა და ქვებით ვსდიოთ".

ხელოვანისთვის ასევე გაუგებარია სიძულვილი განსხვავებული ადამიანების მიმართ და დასძენს, რომ მართალია არ ესმის ჰომოფობია და აგრესია, მაგრამ მისი აზრით ეს პრობლემა საზოგადოებაში არამხოლოდ ლგბტქ ადამიანების მიმართ არსებობს:

"რატომ გვეზიზღება ეს ხალხი, რომელსაც ჩვენთვის არაფერი დაუშავებია და საერთოდ არავისთვის არაფერი დაუშავებია? უბრალოდ ასეთია და უნდა რომ ამაზე ლაღად გამოთქვას აზრი. [...] მასობრივი ზიზღია საზოგადოებაში არამარტო ლგბტ თემის მიმართ, ზოგადად, ძალიან ბევრი განსხვავებული ადამიანის მიმართ, ვერ ვიტანთ სხვანაირს, ვერ ვიტანთ ჩვენნაირს, ეს ვერატანა გვჭირს ზედოზირებით და მე ამისი გაცილებით უფრო მეშინია, ვიდრე ყველაფერი დანარჩენის. [...] იმედი მაქვს, ეს ზიზღი სამარცხვინო გახდება".

პრაიდის კვირეული

გუშინ, პირველ ივლისს თბილისი პრაიდის კვირეული დაიწყო. პირველ ღონისძიებაზე ბრიტანული დოკუმენტური ფილმის პრეზენტაცია გაიმართა, რომელიც 2019 წლის პრაიდის მოვლენების შესახებ მოგვითხრობს.

ღონისძიებას რამდენიმე ათეული პირი ესწრებოდა, მათ შორის დიპლომატიური კორპუსის წარმომადგენლები — გერმანიისა და დიდი ბრიტანეთის ელჩები. ბრიტანეთის ელჩმა, მარკ კლეიტონმა დამსწრეებს სიტყვით მიმართა და ლგბტ თემს სოლიდარობა გამოუცხადა.

ღონისძიების პარალელურად შეკრებილნი იყვნენ ჰომოფობიური ჯგუფები, რომლებიც აგრესიულად იყვნენ განწყობილნი, ბოთლებს, ქვებსა და კვერცხებს ისროდნენ.

ადგილზე მობილიზებული იყო ათობით პოლიციელი. თუმცა პრაიდის ორგანიზატორები ამბობენ, რომ სამართალდამცავების ყოფნის მიუხედავად აშშ-ს საელჩოს წარმომადგენელს კვერცხი მოხვდა, ხოლო ერთ-ერთ სტუმარს დაარტყეს. ვითარება ადგილზე რამდენჯერმე დაიძაბა.

ფილმის ჩვენების შემდეგ უსაფრთხოების ზომებიდან გამომდინარე სტუმრებმა ტერიტორია პოლიციის კორდონის საშუალებით დატოვეს და შესასვლელთან მათ მიკროავტობუსები ელოდებოდათ. ამ ხნის განმავლობაში ჰომოფობიური ჯგუფების შეძახილები და ბოთლების სროლა არ წყდებოდა.