ნაციონალური მოძრაობის წევრი, თინა ბოკუჩავა პრაიდის კვირეულზე საუბრისას ამბობს, რომ ყველას უნდა ჰქონდეს კონსტიტუციურად მინიჭებული უფლების მშვიდობიანად განხორციელების შესაძლებლობა, რაც "ქართული ოცნების რეჟიმის" პრიობებში დაცული არ არის.

"რეალურად არავინ არ ისჯება. რაც მეტყველებს კიდევ ერთხელ იმაზე, რომ თავად ხელისუფლების ინსტრუმენტია ძალადობა და ძალადობის გამოყენება განსხვავებული აზრის მქონე ადამიანების მიმართ. ეს არ არის მხოლოდ ამ თემის მიმართ, არამედ ძალიან ბევრი სხვადასხვა მიმართულებით. იგივე კრიტიკული მედია იქნება, პოლიტიკური ოპონენტები თუ სხვა. ძალადობა არის ამ ხელისუფლების სამარკო ნიშანი და არა ადამიანებისთვის კონსტიტუციურად მინიჭებული უფლებების მშვიდობიანად გამოხატვის შესაძლებლობა", — აღნიშნავს ის.

On.ge-სთან საუბრისას ის აღნიშნავს, რომ ხშირად ქართული ოცნების წარმომადგენლები არიან ძალადობის წამხალისებლები, მათ შორის იმით, რომ არ სჯიან მათ, ვინც ძალადობრივად მოქმედებს.

"არა მხოლოდ ამ კონკრეტულ სიტუაციაში, ეს არის ზოგადი ტრენდი, ეს არის ზოგადი დამოკიდებულება, იმიტომ, რომ ძალადობა არის მათი სამარკო ნიშანი და თავად ახალისებენ ამ ძალადობას, მათ შორის იმით, რომ არავის სჯიან, ვინც ძალადობრივად მოქმედებს. მოგეხსენებათ, რომ პრევენციის ერთადერთი მართლზომიერი გზა არის, რომ მოძალადე კანონის სრული სიმკაცრით და ყველა ნორმით, რომელიც გათვალისწინებულია კანონში დაისაჯოს და ამით მოხდეს მომავალი ძალადობის პრევენცია", — ამბობს ის.

28 ევროპარლამენტარმა შინაგან საქმეთა მინისტრ ვახტანგ გომელაურს მოუწოდა, დაიცვას Tbilisi Pride-ის მონაწილეები და მათი გამოხატვის თავისუფლებისა და მშვიდობიანი შეკრების უნივერსალური უფლების განხორციელება უზრუნველყოს.

წერილში საუბარია ქართული ოცნების თავმჯდომარის, ირაკლი კობახიძის ბოლოდროინდელი კომენტარზე, რომელმაც თქვა, რომ ღირსების მარში უნდა გაუქმებულიყო. ევროპარლამენტარების შეფასებით, ეს განცხადება ადამიანის უნივერსალურ უფლებებს ეწინააღმდეგება.

პარლამენტის თავმჯდომარის, კახა კუჭავას აზრით, ევროპარლამენტარების მიმართვა საჭირო იქნებოდა, "ამის საფუძველი რომ არსებობდეს".


Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.