ნაციონალური მოძრაობის დეპუტატი, ანი წითლიძე ღირსების მარშთან დაკავშირებით ამბობს, რომ თუ ხელისფულება შეეცდება რადიკალური ჯგუფები მათ დააპირისპიროს, ის იქნება ერთ-ერთი, ვინც გავა და აქტივისტებს დაიცავს. აღნიშნულზე წითლიძემ On.ge-სთან ისაუბრა.

"ხელისუფლების ვალდებულება არის მათი დაცვა და თუ მართლა ისე მოხდება, რომ ხელისუფლება შეეცდება რადიკალური ჯგუფები მათ დააპირისპიროს, მე ვიქნები ერთ-ერთი, ვინც გავალ და დავიცავ, იმიტომ, რომ ამ ადამიანებს აქვთ ამის უფლება რეალურად, რომ გამოხატონ თავიანთი პოზიცია", — განაცხადა წითლიძემ.

მისივე თქმით, ამ ადამიანებს აქვთ კონსტიტუციური უფლება გამოხატვის და ხელისუფლება ვალდებულია ისინი დაიცვას.

"მე ვფიქრობ, რომ ამ ადამიანებს აქვთ კონსტიტუციური უფლება გამოხატვის, შესაბამისად ეს მათი უფლებაა, შეუძლიათ გამოხატონ ეს ნებისმიერი ფორმით და მათი დაცვა არის ხელისუფლების პირდაპირი მოვალეობა. ძალიან საინტერესოა, რომ კონსტიტუციონალისტი, ირაკლი კობახიძე კონსტიტუციური უფლების გამოხატვას უკრძალავს ადამიანებს. მე არ ვიცი რა დაშავდება იმით, რომ ამ ადამიანებმა ჩაატარონ ეს პრაიდი. როგორი არსებული სიტუაციაც არ უნდა იყოს ქვეყანაში, თუ საგანგებო მდგომარეობა არ არის გამოცხადებული, კონსტიტუციური უფლების შეზღუდვა არის წარმოუდგენელი ამბავი", — თქვა დეპუტატმა.

ხელისუფლების ვალდებულება არის მათი დაცვა და თუ მართლა ისე მოხდება, რომ ხელისუფლება შეეცდება რადიკალური ჯგუფები მათ დააპირისპიროს, მე ვიქნები ერთ-ერთი, ვინც გავალ და დავიცავ, იმიტომ, რომ ამ ადამიანებს აქვთ ამის უფლება რეალურად, რომ გამოხატონ თავიანთი პოზიცია.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადა მისცა, რომელიც 25 ივნისს გავიდა.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.