ძალიან მალე დიდი ამერიკელი მეცნიერის, კარლ სეიგანის უმნიშვნელოვანესი ნაშრომის — კოსმოსის წაკითხვა ქართულ ენაზეც შეგვეძლება. კიდევ უფრო სასიხარულო ინფორმაცია კი ისაა, რომ სულაკაურის გამომცემლობის თარგმანს თან ქართველი ასტროფოტოგრაფების — დავით დვალის, დიმიტრი გოდერძიშვილის, ლაშა ებიტაშვილის, ლევან ვერძეულის, ბექა მამუკაშვილისა და ტბელ აბუსერიძის ნამუშევრები ერთვის.

კარლ სეიგანი მეოცე საუკუნის ასტრონომიისა და კოსმოსის კვლევის მეცნიერებათა დოქტორი, ასტროფიზიკოსი და მწერალია. იგი 1980 წელს გამოსული ერთ-ერთი ყველაზე პოპულარული სატელევიზიო სერიალის, Cosmos: A Personal Voyage-ის თანაავტორი და მთხრობელი იყო. სერიალი 60 ქვეყანაში 500 მილიონზე მეტ ადამიანს აქვს ნანახი. სეიგანმა წიგნი კოსმოსი პოპულარული სერიალის პარალელურად დაწერა.

მხატვრულად საკითხავ სამეცნიერო ნაწარმოებში ისეთი თემები, როგორებიცაა სამყაროს, პლანეტების, კოსმოსისა თუ სიცოცხლის წარმოშობა, მარტივი და გასაგები ენითაა ახსნილი. კოსმოსი შავი ხვრელივით შეისრუტავს და მეცნიერებას შეაყვარებს ნებისმიერ ადამიანს, რომელიც ამ წიგნს გადაშლის. კოსმოსი ქართულ ენაზე ნოდარ მანჩხაშვილმა თარგმნა.