ტროტუარზე დგომის ფორმით პროტესტის გამოხატვისთვის საია-ს იურისტი გიორგი გოცირიძე სასამართლოში დაიბარეს. სხდომა 16 მარტს ჩაინიშნა და საქმეს მოსამართლე დავით მაკარაძე განიხილავს.

გოცირიძემ "ტვ პირველთან" საუბრისას განაცხადა, რომ მის წინააღმდეგ არ არსებობს მტკიცებულება, რომელიც მისი მხრიდან ტროტუარის ან გზის გადაკეტვას დაადასტურებს. იურისტმა ასევე დასძინა, რომ აქციის შესახებ პროტესტის მონაწილეებს შსს-გან თანხმობა მიღებული ჰქონდათ.

"ჩემს შემთხვევაში არ არსებობს კადრი, რომელიც ადასტურებს იმას, რომ მერუსთავლის პროსპექტზე გადაადგილების მსურველ ნებისმიერ ადამიანს ხელი შევუშალე, ან ტროტუარი რაიმე ფორმით გადავკეტე — მე ისეთ ადგილას ვიდექი, რომ ორივე მხრიდან გადაადგილების მსურველი მოქალაქეები მოძრაობდნენ. არ არსებობს ბუნებაში მტკიცებულება, რომელიც დაადასტურებდა, რომ მე მათ გადაადგილებაში ხელი შევუშალე. რა თქმა უნდა, შსს შეუძლია ასეთი კადრები მოიტანოს სასამართლოში, თუმცა ნათელი გახდება რომ ტროტუარის გადაკეტვას არ ჰქონია ადგილი. ასევე არსებობდა გაფრთხილებაც და ეს შეკრება იყო კანონიერი, ადმინისტრაციული სამართალდაღვევის ჩადენისთვის, ეს არის 174-ე პრიმა მუხლით გათვალისწინებული სამართალდარღვევა, ერთადერთი უალტერნატივო სახდელი ადმინისტრაციული პატიმრობაა," — განაცხადა გოცირიძემ ტვ პირველთან საუბრისას.

იურისტის სასამართლოში დაბარებას საია-ს ხელმძღვანელი თამარ ონიანიც გამოეხმაურა.

"გიორგი გოცირიძე, რომელიც წლებია საქართველოს კონსტიტუციის დაცვაზე სტრატეგიული სამართალწარმოების გზით მუშაობს საქართველოს ახალგაზრდა იურისტთა ასოციაციაში, თავად გახდა ანტიკონსტიტუციური მოწესრიგების სამიზნე, როდესაც დღეს სასამართლოში დაბარების თაობაზე მიიღო ინფორმაცია.

ტროტუარზე დგომის ფორმით მშვიდობიანი პროტესტი ადამიანის უფლებაა და მასში პატიმრობის სანქციის ფორმით ჩარევა გაუმართლებელი ღონისძიებაა, რომელიც არა ინტერესთა ბალანსს, არამედ რეპრესიას ისახავს მიზნად: რომ შეშინდეს ყველა, ვინც თუნდაც ტროტუარზე გამოხატავს პროტესტს. ეს არის ერთ-ერთი ელემენტი იმ ღონისძიებებისა, რომლითაც განსხვავებული აზრის ტოტალური კონტროლის მცდელობები ინიციირდება," — წერს თამარ ონიანი.

შეგახსენებთ, 2025 წლის 10 დეკემბერს, ოცნების ხელისუფლების პარლამენტმა შეკრება-მანიფესტაციის შესახებ კანონში ცვლილებები მიიღო, რომლის მიხედვითაც შეზღუდვა წესდება ხალხის მოძრაობის ადგილას შეკრებაზე. დაგეგმილი აქცია-დემონსტრაციის შესახებ დემონსტრანტებმა შსს 5 დღის ვადაში უნდა გააფრთხილონ. კანონპროექტში ასევე ვკითხულობთ, რომ უქმდება სახდელით სახით აღმკვეთი ღონისძიება და კანონის დარღვევის შემთხვევაში მოქალაქეს პატიმრობა ემუქრება.

აღნიშნული კანონპროექტის დარღვევის შემთხვევაში აქციის მონაწილეს 15 დღემდე პატიმრობა ემუქრება, ორგანიზატორს — 20 დღემდე. თუ ამ მუხლით სახდელდადებული პირი იგივე ქმედებას ჩაიდენს, მას სისხლისსამართლებრივი პასუხისმგებლობა დაეკისრება. სასჯელის სახედ კი გათვალისწინებულია თავისუფლების ერთ წლამდე აღკვეთა.