ხშირად გვგონია, რომ ჯანსაღი ცხოვრების წესი გემრიელ დესერტებთან დამშვიდობებას ნიშნავს. თუმცა, სინამდვილეში, სწორი ინგრედიენტებითა და კრეატიულობით ტკბილეულობის დავიწყება სულაც არ მოგიწევთ.

ამ სტატიაში გაგიზიარებთ 5 რეცეპტს, რომელიც დაგარწმუნებთ, რომ დესერტი ერთდროულად შესაძლოა სასარგებლოც, დაბალკალორიულიც და რაც მთავარია — საოცრად გემრიელიც იყოს.

1. ავოკადოს მუსი

პირველი ასეთი დესერტი ავოკადოს მუსია, რომელიც ძალიან მარტივად მზადდება და შეგიძლიათ შოკოლადის კარაქის მაგივრადაც მიირთვათ. ბევრს ჰგონია, რომ ავოკადო მხოლოდ ტოტსა და სალათებს უხდება, თუმცა მისი კრემისებრი სტრუქტურა იდეალურ ბაზას ქმნის ნაზი, ჰაეროვანი დესერტისთვის.

რა დაგჭირდებათ:

• 1 ცალი კარგად დამწიფებული, რბილი ავოკადო;
• 50-60 გრამი კაკაო ან გამდნარი შავი შოკოლადი;
• 2 სუფრის კოვზი თაფლი;
• მარილი;
• ბანანი (გემოვნებისამებრ);

მომზადების წესი: თუ შავ შოკოლადს იყენებთ, დაადნეთ და ოდნავ შეაგრილეთ. ბლენდერში მოათავსეთ ავოკადო, დაამატეთ კაკაო (ან შოკოლადი), თაფლი და ცოტა მარილი. შეგიძლიათ განსხვავებული არომატისთვის ბანანიც გამოიყენოთ. თქვიფეთ იქამდე, სანამ მასა სრულიად ერთგვაროვანი არ გახდება. მიღებული მუსი შეგიძლიათ პირდაპირ მიირთვათ ან შოკოლადის კარაქის ალტერნატივად გამოიყენოთ.

2. ბანანის ნაყინი

თუ ნაყინი ძალიან გიყვართ, მაგრამ მაღაზიაში ნაყიდი პროდუქტების კალორიულობა და შაქრის შემცველობა გაშინებთ, ეს რეცეპტი თქვენი ფავორიტი გახდება. ეს დესერტი არამხოლოდ გემრიელია, არამედ ძალიან მარტივად მზადდება.

რა დაგჭირდებათ:

• 2-3 ცალი მწიფე ბანანი;
• 1 სუფრის კოვზი რძე;
• სურვილისამებრ: ვანილი, კენკრა ან ცოტაოდენი ნიგოზი.

მომზადების წესი: დაჭერით ბანანი, მოათავსეთ კონტეინერში და მინიმუმ 2 საათით შედეთ საყინულეში. გაყინული ბანანის ნაჭრები გამოიღეთ, ჩაყარეთ ბლენდერში, დაამატეთ ცოტაოდენი რძე და თქვიფეთ მანამ, სანამ მასა ნაზი ნაყინის ტექსტურას არ მიიღებს.

მიღებული ნაყინი შეგიძლიათ სხვადასხვა ინგრედიენტით გააფორმოთ — თხილით, კენკრით, ნუშითა თუ შავი შოკოლადით.

3. ჩიას პუდინგი

ეს დესერტი მათთვისაა, ვისაც დილით საჭმლის მომზადების დრო ან ენერგია არ აქვს, მაგრამ ტკბილი და ნოყიერი საუზმე უყვარს. ჩიას პუდინგი დღის ნებისმიერ დროს შეგიძლიათ მიირთვათ, მაგრამ დილით განსაკუთრებით გემრიელია.

რა დაგჭირდებათ:

• 3 სუფრის კოვზი ჩიას თესლი;
• 1 ჭიქა რძე;
• 1 ჩაის კოვზი თაფლი;
• ნებისმიერი ხილი ან კენკრა (მაგალითად: მარწყვი, ჟოლო, მოცვი ან ატამი).

მომზადების წესი: ჭიქაში ან ქილაში ჩაასხით რძე, დაამატეთ ჩიას თესლი და თაფლი. კარგად აურიეთ, რათა ჩიას მარცვლები თანაბრად გადანაწილდეს. დატოვეთ მაცივარში მინიმუმ 4 საათით (იდეალურია მთელი ღამით), რათა თესლმა სითხე შეიწოვოს.

მიღებულ პუდინგს ჭამამდე ზემოდან მოაყარეთ კენკრა ან ხილის ნაჭრები. თუ უფრო მეტი არომატი გსურთ, შეგიძლიათ ოდნავ ვანილიც დაამატოთ.

4. ჟოლოსა და ქოქოსის ბურთულები

მეოთხე დესერტი ჟოლოსა და ქოქოსის ბურთულებია. თუ კენკრის ტკბილეული გიყვართ, ეს ჯანსაღი ინგრედიენტებით სავსე დესერტი აუცილებლად უნდა მოამზადოთ.

რა დაგჭირდებათ:

• 1 ჭიქა (დაახლოებით 135 გრამი) გაყინული ჟოლო (ოდნავ შეათბეთ, რომ დარბილდეს);
• 135 გრამი შვრიის ფანტელი;
• 2 სუფრის კოვზი ნეკერჩხლის სიროფი (ან თაფლი);
• 1 სუფრის კოვზი ჩიას თესლი;
• 50 გრამი ქოქოსის ფანტელი.

მომზადების წესი: ბლენდერში მოათავსეთ ჟოლო, შვრია, სიროფი, ჩიას თესლი და ქოქოსის ფანტელები (ცოტა დაიტოვეთ); ათქვიფეთ ერთგვაროვანი მასის მიღებამდე. შემდეგ მასა გადაიტანეთ ჯამში, დააფარეთ თავსაფარი და შედგით მაცივარში 4 საათით იმისთვის, რომ კარგად გასქელდეს.

გამოიღეთ მასა მაცივრიდან, დაამზადეთ პატარა ბურთულები და ამოავლეთ დარჩენილ ქოქოსის ფანტელებში. ბურთულები შეინახეთ მაცივარში, თავდახურულ კონტეინერში და გემრიელად მიირთვით.

5. ვაშლის კრამბლი

დაბოლოს, ვისაც ხრაშუნა საკვები და გამომცხვარი ხილი უყვარს, ეს დესერტი ძალიან მოეწონება.

რა დაგჭირდებათ:

• 2 ცალი ვაშლი;
• 50 გრამი ნაღების კარაქი;
• 1 ჩაის კოვზი დარიჩინი;
• 100-120 გრამი შვრიის ფანტელი;
• 30-40 გრამი დაჭრილი ნიგოზი;
• 2 სუფრის კოვზი თაფლი.

მომზადების წესი: გაახურეთ ღუმელი 200°C-ზე. დაჭრილი ვაშლი მოათავსეთ გამოსაცხობ ფორმაში და მოაყარეთ ცოტა დარიჩინი. ცალკე ჯამში აურიეთ კარაქი, შვრია, ნიგოზი და თაფლი მანამ, სანამ ფხვიერ მასას არ მიიღებთ. მოაყარეთ ეს ყველაფერი ვაშლს და გამოაცხვეთ 20 წუთი. თაფლი გამოცხობისას კარამელიზდება და ვაშლს სასიამოვნო სიტკბოს მისცემს.