სამტრედიაში სხეულის ამპუტირებული ნაწილების მიტოვებულ შენობაში დატოვების ბრალდებით 3 პირს პატიმრობა შეუფარდეს.

გარემოსათვის საშიში ნივთიერებისადმი მოპყრობის წესის დარღვევის ფაქტზე დაკავებულ სამ პირს ბრალდება წარუდგინეს.

პროკურატურის ცნობით, შპს "ეკო მედიკალ ჯგუფი"-ს და შპს "ეკოლოგია და სუფთა გარემო"-ს დირექტორმა, ქალაქ სამტრედიაში, ერთ-ერთ ამორტიზებულ შენობაში, მოაწყო სახიფათო ნარჩენების შენახვის უკანონო ობიექტი, სადაც დროებით განათავსა დიდი რაოდენობით ადამიანის ჯანმრთელობისა და გარემოსთვის საშიში სამედიცინო ნარჩენები.

სამართალდამცავებმა კომპანიის დირექტორი და ამავე კომპანიის თანამშრომელი, ასევე მუნიციპალიტეტის კეთილმოწყობისა და მომსახურების ცენტრის თანამშრომელი, მოსამართლის განჩინების საფუძველზე დააკავეს. მათ ბრალდება საქართველოს სისხლის სამართლის კოდექსის 288-ე მუხლის პირველი ნაწილით (გარემოსათვის საშიში ნივთიერებისადმი ან ნარჩენისადმი მოპყრობის წესის დარღვევა) წარედგინათ.

მომხდარის შესახებ ინფორმაცია თავდაპირველად "ტვ პირველმა" გაავრცელა. მათი ცნობით, სხვადასხვა ოპერაციების დროს, კლინიკებში სხეულის ამპუტირებული ნაწილები სოფელ მელაურის მცხოვრებლებმა ყოფილი ფერმის ტერიტორიაზე, რამდენიმე დღის წინ აღმოაჩინეს. სატელევიზიო სიუჟეტში მოსახლეობა ამბობს, რომ თავდაპირველად მათ ყურადღება მძაფრმა სუნმა მიიქცია. მოგვიანებით კი შემთხვევით აღმოაჩინეს ადამიანის ძვლები, რომლითაც ძაღლებმა გამოიტანეს. ადგილობრივები ეჭვობდნენ, რომ სამედიცინო დაწესებულებებიდან გამოტანილი ამპუტირებული სხეულის ნაწილებს აქ უკანონოდ ყრიან.