"საზოგადოება და ბანკების" დამფუძნებელი გიორგი კეპულაძე განმარტავს რა არის საჭირო საქართველოში იმისთვის, რომ ბანკი გახსნათ. ცნობისათვის ცოტა ხნის წინ დიდი ბრიტანეთის მიერ სანქცირებულმა "იმედმა" გაავრცელა ინფორმაცია იმის შესახებ, რომ რამდენიმე თვეში, შექმნიან საკუთარ ბანკს, სახელწოდებით "იმედის ბანკი".

გიორგი კეპულაძის თქმით, ეს არის კომპლექსური პროცესი, რომელიც რამდენიმე ფუნდამენტურ მოთხოვნას აერთიანებს — საქართველოში ბანკის შესაქმნელად სავალდებულოა მინიმუმ ₾50 მლნ-ის განთავსება. ₾50 მლნ-ის მიღმა, ბანკის ინფრასტრუქტურის ნულიდან მოსაწყობად ათეულობით მილიონი ლარია საჭირო.

გიორგი კეპულაძის მიერ სოციალურ ქსელში გავრცელებულ ინფორმაციას სრულად გთავაზობთ:

"საქართველოს ეროვნული ბანკის მოთხოვნით, ბანკის შესაქმნელად სავალდებულოა მინიმუმ 50 მილიონი ლარის განთავსება. ეს არის საწესდებო კაპიტალი, ე.წ. ბუფერი, რომელიც ფინანსური მდგრადობის უზრუნველსაყოფად ინახება და მისი საოპერაციო ხარჯებისთვის გამოყენება დაუშვებელია.

50 მილიონის მიღმა, ბანკის ინფრასტრუქტურის ნულიდან მოსაწყობად ათეულობით მილიონი ლარია საჭირო. ეს მოიცავს ძირითადი საბანკო პროგრამული უზრუნველყოფის დანერგვას, კიბერუსაფრთხოების თანამედროვე სისტემებს, ფიზიკურ ინფრასტრუქტურას და პროფესიონალი გუნდის შენახვას.

მარეგულირებელი ითხოვს კაპიტალის წარმომავლობის სრულ დადასტურებას. მფლობელობის სტრუქტურა ბოლომდე ნათელი უნდა იყოს, რათა თავიდან ავიცილოთ ფულის გათეთრებისა და სხვა სისტემური რისკები.

ინვესტორებს, სამეთვალყურეო საბჭოსა და მენეჯმენტს უნდა ჰქონდეთ უნაკლო პროფესიული და ფინანსური რეპუტაცია. მსგავს ინსტიტუტში სრულად დაუშვებელია ინტერესთა კონფლიქტი.

აუცილებელია დეტალურად გაწერილი ბიზნეს-გეგმა, კორპორაციული მართვის უმაღლესი სტანდარტები და რისკების მართვის გამართული, საერთაშორისო დონის ჩარჩო.
ასე რომ, საბანკო ლიცენზიის მოპოვება რეპუტაციის, სანდოობისა და რეგულაციებთან სრული შესაბამისობის უმკაცრესი ტესტია და არა მხოლოდ საბანკო ანგარიშზე თანხის არსებობის დასტური”, — წერს გიორგი კეპულაძე სოციალურ ქსელში.

შეგახსენებთ, რომ დიდმა ბრიტანეთმა სამთავრობო პროპაგანდისტული "იმედი" და "პოსტვ" 24 თებერვალს დაასანქცირა.

რის შემდეგაც ოცნების საგარეო უწყებაში დაიბარეს დიდი ბრიტანეთის ელჩი გარეთ უორდი. შეხვედრის დასრულების შემდეგ საგარეო უწყების ხელმძღვანელმა, მაკა ბოჭორიშვილმა განაცხადა, რომ "40 წუთის განმავლობაში არ მოუსმენია არც ერთი არგუმენტი, რომელიც "იმედის" და "პოსტვ"-ის დასანქცირებას გაამართლებდა.