ქართული ოცნების ახალი დადგენილებით, ქუთაისის უნივერსიტეტის საბაკალავრო პროგრამების სიაში ასტროენათმეცნიერებისა და ასტროარქეოლოგიის პროგრამები აღარ იძებნება.

ოცნების ხელისუფლების მთავრობის გადაწყვეტილებით, სახელმწიფო უნივერსიტეტებში მისაღები ადგილების რაოდენობა გაიზარდა. კერძოდ, ბაკალავრიატსა და ერთსაფეხურიან საგანმანათლებლო პროგრამებზე განსაზღვრული რაოდენობა 21 300 გაიზარდა 21 574-მდე, ხოლო მაგისტრატურის პროგრამებზე მისაღები 3 233 ადგილი — 3 335-ით.

შეგახსენებთ, რომ ოცნების ხელისუფლების მთავრობის წინა დადგენილებით ასტროლინგვისტიკის პროგრამაზე, 2026 წლის სასწავლო გეგმით, 20 სტუდენტი უნდა მიეღოთ. ამ მიმართულებით სწავლა ქუთაისის საერთაშორისო უნივერსიტეტში უნდა ყოფილიყო შესაძლებელი, რომელიც ბიძინა ივანიშვილისა და მისი ოჯახის დაფინანსებით 6 წლის წინ გაიხსნა.

განათლების რეფორმის ფარგლებში, ოცნების ხელისუფლების მიერ საუნივერსიტეტო კვოტების გადანაწილებას პროტესტი მოჰყვა. 14 თებერვალს, პროსამთავრობო ტელევიზიის იმედის გამართულ დებატებში ილიას სახელმწიფო უნივერსიტეტის რექტორმა, ნინო დობორჯგინიძემ ირაკლი კობახიძეს ბაზრის კვლევის შესახებ კითხვა დაუსვა — "თქვენ რომ ახლა შრომის ბაზრის "კვლევა" ჩაატარეთ, იმან გაჩვენათ, რომ ქვეყანაში 5 კომუნიკაციისა და მეტყველების პედაგოგი და 20 ასტროლინგვისტი გჭირდებათ?".

კობახიძემ ეთერში პირობა დადო, რომ ახლო მომავალში "კვლევის" პრეზენტაცია გაიმართებოდა. თუმცა, 24 თებერვალს გამართულ ამავე კვლევის პრეზენტაციაზე ასტროლინგვისტიკა არ უხსენებია.