პარლამენტის თავმჯდომარის, კახა კუჭავას განცხადებით, შიდა პარტიულ კვლევებს ატარებენ, რომლის მიხედვითაც "ფეხზე მყარად დგანან". ბოლო პერიოდში გამოქვეყნებული კვლევის შედეგებზე საუბრისას ის ამბობს, რომ პარტიის მიერ ჩატარებულ კვლევებს ენდობიან და იციან, რეალურად რა შედეგი აქვთ.

"რა თქმა უნდა, ჩვენ შიდა კვლევებს ვატარებთ და ბოლო კვლევა, რომელიც ჩავატარეთ, საკმაოდ მყარად ვდგავართ ფეხზე და ეს არ არის 43%, გაცილებით მაღალია. რა თქმა უნდა, არ დავკონკრეტდები, თუმცა ჩვენ მივუახლოვდებით არჩევნებს და ყველა ძალიან კარგად დაინახავს იმ ძალას და იმ მხარდაჭერას, რომელიც ქართულ ოცნებას გააჩნია", — განაცხადა მან პალიტრანიუსის ეთერში.

ბოლო 2 კვლევის შედეგის მიხედვით, ქართული ოცნება ვერ გადალახავს იმ 43%-იან ბარიერს, რომელიც შეთანხმების დოკუმენტის მიხედვით დაწესდა. ასეთ შემთხვევაში, მმართველმა გუნდმა აიღო ვალდებულება, რომ რიგგარეშე საპარლამენტო არჩევნები დანიშნოს.

მთავარი არხის მიერ დაკვეთილი IPSOS-ის კვლევის თანახმად, ხვალ რომ ადგილობრივი თვითმმართველობის არჩევნები ტარდებოდეს 32% ხმას ქართულ ოცნებას მისცემდა, 23% ნაციონალურ მოძრაობას, 8% კი გიორგი გახარიას პარტიას — საქართველოსთვის.

ხოლო ტელეკომპანია ფორმულას დაკვეთით ჩატარებული Edison Research-ის კვლევის მიხედვით, კითხვაზე — "დღეს რომ თბილისის მერის არჩევნები ტარდებოდეს, ვის მისცემდით ხმას ამ არჩევანის შემთხვევაში?" გამოკითხულთა 34% გაერთიანებული ოპოზიციის კანდიდატს ასახელებს, 30% — ქართულ ოცნებას, ხოლო 13% გიორგი გახარიას პარტიის, საქართველოსთვის კანდიდატს.