თბილისის საქალაქო სასამართლომ ე.წ. კრიმინალურ ავტორიტეტს, ვატო ყიფიანს აღკვეთის ღონისძიების სახით პატიმრობა შეუფარდა. არსებული ინფორმაციით, ყიფიანს ძმები ფეიქრიშვილების მკველობის მომზადებას ედავებიან. საქმეზე განხილვები გაგრძელდება და სასჯელთან დაკავშირებით მოსამართლის საბოლოო გადაწყვეტილება ამის შემდეგ გახდება ცნობილი.

ყიფიანმა სასამართლოზე თქვა, რომ საქართველოში ჩამოსვლის შემდეგ, აეროპორტშივე პოლიციამ უთხრა, რომ მისი აქ ყოფნა სასურველი არ იყო, მაგრამ არ წავიდა. მისივე თქმით, ამ საქმეზე ჩვენება უკვე მიცემული აქვს.

პროკურატურა ყიფიანს ედავება დამამძიმებელ გარემოებაში ორი ან მეტი პირის შეკვეთით, ჯგუფურად განზრახ მკვლელობის მომზადებას ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას, ასევე ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობის მართლსაწინააღმდეგო შეძენის, შენახვის, გადაზიდვისა და გასაღების ორგანიზებას.

პროკურატურა ამბობს, რომ ამ საქმეზე სასამართლოს ექვსი პირის მიმართ უკვე გამოტანილი აქვს გამამტყუნებელი განაჩენი, ხოლო დანაშაულში შესაძლო ჩართულ სხვა პირებთან მიმართებაში გამოძიება გრძელდება.

ვატო ყიფიანი გუშინ, 25 ივნისს, თბილისის საერთაშორისო აეროპორტში დააკავეს. გუშინვე, უკრაინის ეროვნულმა პოლიციამ განაცხა, რომ ე.წ. კრიმინალური ავტორიტეტი ვატო ყიფიანი საქართველოში გააძევეს.

უკრაინის სამართალდამცავი სტრუქტურა ოფიციალურ განცხადებაში აღნიშნავს, რომ 42 წლის ვატო ყიფიანი სხვა ქვეყნებში წარსულში დაუკავებიათ სხვადასხვა მძიმე დანაშაულის გამო, მათ შორის მკვლელობისთვის.

"უკრაინაში ის რუს და ქართველ ე.წ. კანონიერ ქურდებს წარმოადგენდა, აკონტროლებდა დაჯგუფებებს, რომლებიც გამოძალვითა და ქურდობით არიან დაკავებულნი და უშუალოდ იყო პასუხისმგებელი დანაშაულებრივი შეკრებების ორგანიზებაზე", — ვკითხულობთ განცხადებაში.