პარლამენტში ანგარიშის წარსადგენად მისულ პრემიერმინისტრს დეპუტატმა, თამარ კორძაიამ ჰკითხა, ფიქრობს თუ არა, რომ ღირსების მარშზე მისი მისვლა უზრუნველყოფს მსვლელობის მონაწილეების უსაფრთხოებას და აპირებს თუ არა ასე მოიქცეს.

"5 ივლისის აქცია ახსენეს აქ და პერსონალურად თქვენ თუ გრძნობთ, როგორც პრემიერმინისტრი იმას, რომ თქვენი პერსონალური მისვლა თბილისი პრაიდის ღირსების მარშზე უზრუნველყოფს მათ უსაფრთხოებას ჭეშმარიტად და თუ ხართ მზად, რომ მიხვიდეთ და მხარი დაუჭიროთ მათ?" — იკითხა კორძაიამ.

ამავე თემაზე ღარიბაშვილს მიმართა რესპუბლიკური პარტიის ლიდერმა, ხათუნა სამნიძემ. ტრიბუნიდან დეპუტატმა მოუწოდა პრემიერს, ღირსების მარშის მონაწილეებს მისცეს გარანტია, რომ სახელმწიფო მათ დაიცავს.

"ადამიანის უფლებებზე საუბრობდით. 5 ივლისს დაგეგმილია ღირსების მარში, რასთან დაკავშირებითაც სხვადასხვა ჯგუფის მხრიდან უამრავი, ძალიან სახიფათო განცხადება კეთდება. მინდა, რომ თქვენ ამ მნიშვნელოვანი ტრიბუნიდან თითოეულ ადამიანს მისცეთ გარანტია, რომ ისინი დაცულები იქნებიან ამ დროს და ის მუქარები, რომლებიც ისმის ვერაფერს დააკლებს ამ ადამიანებს და პირველ რიგში დაიცავთ კონსტიტუციას. თუ შეიძლება ამ ტრიბუნიდან თქვენი პირადი დამოკიდებულება და მზაობა, რომ დაიცავს სახელმწიფო ადამიანებს, გვითხრათ", — განაცხადა სამნიძემ.

ღარიბაშვილს ჯერ არ უპასუხია, ვინაიდან ამ დრომდე დეპუტატების შეკითხვები გრძელდება, რომლის ამოწურვის შემდეგაც მას პასუხებისთვის დრო მიეცემა.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადას აძლევს.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.