რუსთავი 2-ის ჟურნალისტი თეა ადეიშვილი On.ge-სთან საუბრისას არხის მფლობელთან დაკავშირებით უზენაესი სასამართლოს მიერ მიღებულ გადაწყვეტილებას აფასებს.

თეა ადეიშვილი ამბობს, რომ სამწუხაროა, რომ დიდ პალატაში 5 კეთილსინდისიერი მოსამართლე არ აღმოჩნდა.

"რუსთავი 2 არის ქართული დემოკრატიის ჟანგბადი, სამწუხაროა, რომ უზენაეს სასამართლოში ხუთი კეთილსინდისიერი მოსამართლე არ აღმოჩნდა ვინც ამ ჟანგბადის გადაკეტვას ხელს შეუშლიდა, უფრო უარესი - დღეს უზენაესი სასამართლოს სახურავზე სადაც ასვლა მკაცრად გაწერილი პროტოკოლის და სპეციალური ნებართვის გარეშე შეუძლებელია იდგა სახელმწიფო უშიშროების სამსახურის ოპერატორი და იქ შეკრებილ ხალხს სახურავიდან იღებდა.

მერე ხელისუფლება ითვლიდა ჩვენი მხარდამჭერების რაოდენობას და ფოტოებს მათ მიერ შექმნილ ჩვენს სალანძღავ ვებგვერდზე ათავსებდა.

ეს პატარა ფაქტიც კი ადასტურებს რომ ამ პროცესს არაფერი აქვს საერთო სამართლიან სასამართლოსთან, ამ პროცესს არაფერი აქვს საერთო დემოკრატიასთან. რუსთავი 2 23 წელია მაუწყებლობს, ამ ხნის მანძილზე შესაძლოა ჩვენ დაგვირღვევია ჟურნალისტური სტანდარტები, მაგრამ ჩვენი პრინციპებისთვის, ამ ქვეყნისთვის აუცილებელი განვითარებისთვის, მისი პროგრესისაკენ წინსვლისთვის არასდროს გვიღალატია.

ჩვენ ვართ მკვეთრად გამოხატული პროდასავლური მედია და დიახ ვუქმნით დისკომფორტს ხელისუფლებას, ყველა დემოკრატიულ საზოგადოებაში კრიტიკული მედია ხელისუფლებისთვის სერიოზული დისკომფორტია, მაგრამ როცა დისკომფორტიდან თავის დაღწევას განსხვავებული აზრის, მათი საქმიანობის მამხილებლების ჩახშობით იწყებ, ეს უტყუარი ნიშანია იმისა, რომ ხელისუფლებას საკუთარი საქმიანობის ეშინია, ეშინია სარკეში ჩახედვის, რადგან მედია არის სარკე და ჩვენ ყოველდღე მიგვქონდა ეს სარკე ამ მთავრობისთვის, რომ უკეთესები გამხდარიყვნენ.

ვისაც ეს სარკე არ მივუტანეთ მათ ვერ დაინახეს თავისი ნაკლი და ისინი დიდი და კარგი საქმეების მიუხედავად მწარედ დაეცნენ, ამ ხელისუფლებამ ვერ ისწავლა წინა მთავრობის შეცდომებზე, ამ მთავრობამ ვერ ისწავლა ჯერ კიდევ მე-18 საუკუნეში ნათქვამ ვოლტერის გამონათქვამზე: "შესაძლოა თქვენი აზრები ჩემთვის მიუღებელი იყოს, მაგრამ თავს გავწირავ რათა თქვენ მათი გამოთქმის უფლება გქონდეთ". ხელისუფლება საკუთარ ეზოში ვერ გადაგვრგავს" - ამბობს თეა ადეიშვილი.

უზენაესმა სასამართლომ რუსთავი 2 ქიბარ ხალვაშს მიაკუთვნა.