პრემიერმინისტრის, ირაკლი ღარიბაშვილის განცხადებით, 2 კვირაში ქვეყანაში ვაქცინის მილიონი დოზა შემოვა. მას არ დაუკონკრეტებია და არც კითხვას უპასუხა, თუ რომელ ვაქცინებს ველოდებით.

"ორ კვირაში შემოვა მილიონი დოზა ვაქცინა და ჩვენ დავიწყებთ ძალიან ინტენსიურ ვაქცინაციის პროცესს", — განაცხადა პრემიერმინისტრმა საკოორდინაციო საბჭს სხდომის შემდეგ.

ჯანდაცვის მინისტრის მოადგილის, თამარ გაბუნიას თქმით, საუბარია ოთხი ტიპის ვაქცინაზე — Pfizer, AstraZeneca, Sinopharm და Sinovac.

"აქ იქნება ოთხივე სახის ვაქცინა სხვადასხვა რაოდენობით და პროცესი, რა თქმა უნდა, იქნება ძალიან ინტენსიური. მასობრივი ვაქცინაციის ცენტრებზეც მიდის მუშაობა", — განაცხადა თამარ გაბუნიამ.

გაბუნიას თქმით, ამ დოზებზე წინასწარი რეგისტრაცია შესაძლებელი არ იქნება და სარეგისტრაციო პორტალზე ისინი მას შემდეგ დაემატება, როცა უკვე ქვეყანაში შემოვა.