თბილისის მერის, კახა კალაძის განცხადებით, შეიძლება რუსთაველის თეატრის მოსკოვში გასტროლებზე წასვლის გადაწყვეტილება ბევრისთვის მისაღები არ იყოს, თუმცა დედაქალის მერი ამბობს, რომ კულტურის, პოლიტიკისა და სპორტი ერთმანეთში არევა არავითარ შემთხვევაში არ უნდა მოხდეს.

"რთული თემაა. გეთანხმებით იმაში, რომ როდესაც ქვეყნის 20% ოკუპირებულია, შეიძლება ეს გადაწყვეტილება ბევრისთვის მისაღები არ იყოს თუმცა, იმ მოსაზრებასაც ვემხრობი, რომ კულტურა, პოლიტიკა და სპორტი ერთმანეთში არავითარ შემთხვევაში არ უნდა ავურიოთ, რაც დამაზიანებელი იქნება იმ კონკრეტული სფეროებისთვის. ამიტომ, პოლიტიკა დავტოვოთ პოლიტიკის ნაწილში და სხვა დარგებმა მოახდინონ თავიანთი განვითარება.

ჩემი პოზიციაა — მიუხედავად იმისა, რომ რუსეთი არის ოკუპანტი, მიუხედავად იმისა, რომ ჩვენი ტერიტორიების დიდი ნაწილი აქვთ ოკუპირებული, ყველაფერი უნდა გავაკეთოთ იმისთვის, რომ ვიბრძოლოთ ჩვენი განათლებით, გონიერებით, ეკონომიკური განვითარებით და ა.შ.", — განაცხადა თბილისის მერმა.

21 ივნისს რუსთაველის თეატრმა ოფიციალურად დაადასტურა, რომ დასი მოსკოვში გასტროლებზე მიდის. მათივე თქმით, თავისი 30-წლიანი ისტორიით ჩეხოვის ფესტივალი ერთ-ერთი მნიშვნელოვანი მოვლენა გახდა უკლებლივ ყველასთვის, ვისთვისაც ძვირფასია თეატრი.

20 ივნისს ცნობილი გახდა, რომ რუსთაველის თეატრის დასი მოსკოვში ფესტივალზე გაემგზავრება. ამის შესახებ თეატრის ხელმძღვანელმა, რობერტ სტურუამ რუსულ არხთან განაცხადა. მისივე თქმით, მნიშვნელოვანია მოსკოველ მაყურებელს მათი სპექტაკლი აჩვენონ.

"ჩვენთვის ძალიან სასიამოვნოა, რომ მოსკოველ მაყურებელს შეგვიძლია ვაჩვენოთ ჩვენი ერთ-ერთი ბოლო სპექტაკლი. არაჩვეულებრივი პიესაა, არაჩვეულებრივი ავტორი და ჩემი აზრით, მსახიობებიც ცუდად არ თამაშობენ", — თქვა სტურუამ.

თეატრის ერთ-ერთი მსახიობის, ნანა ფაჩუაშვილის თქმით კი, რუს მაყურებელზე იმედს ამყარებენ, რადგან მათ "მოსმენა უყვართ".

"ახლა, როცა ასეთ რთულ პიესას ვთამაშობთ, იმედს რუს მაყურებელზე ვამყარებთ, რადგან რუს მაყურებელს მოსმენა, დაფიქრება უყვარს", — თქვა მან.

როგორც რუსთაველის თეატრში On.ge-ს განუცხადეს, დასი ჩეხოვის ფესტივალზეა მიწვეული. იქ გვითხრეს, რომ დამატებით კომენტარს ხვალ, 21 ივნისს გააკეთებენ. ჩეხოვის ფესტივალის ვებგვერდზე განთავსებული განრიგის მიხედვით კი, რუსთაველის თეატრის დასი სპექტაკლებს 30 ივნისს, პირველ და 2 ივლისს გამართავს.

გაიგე მეტი: