31 ოქტომბრის არჩევნების შემსწავლელი პარლამენტის დროებითი საგამოძიებო კომისიის წევრი, ფრიდონ ინჯია ცენტრალური საარჩევნო კომისიის (ცესკო) თავმჯდომარეს, თამარ ჟვანიას ბოდიშს უხდის.

"უნდა მოგიხადოთ ბოდიში იმ, პირდაპირ რომ ვთქვათ, შეურაცხყოფების [გამო], რაც თქვენს მიმართ იყო ამ თვეების განმავლობაში. მაშინაც ვიყავი დარწმუნებული, რომ ეს თქვენ არ გეკუთვნოდათ. ახლა, ამ კომისიის მუშაობის შემდეგ კიდევ ერთხელ დავრწმუნდი იმაში, რომ თქვენ არ გეკუთვნოდათ ასეთი გამონათქვამები", — უთხრა ინჯიამ თამარ ჟვანიას.

ევროპელი სოციალისტების ერთ-ერთი ლიდერის თქმით, შეიძლებოდა არჩევნები უფრო უკეთ ჩატარებულიყო, თუმცა ამბობს, რომ არსებული ხარვეზების გამომწვევი "მოცემულობა იყო".

"შეიძლებოდა, რა თქმა უნდა, ეს არჩევნები გაცილებით უფრო კარგად ჩატარებულიყო, მაგრამ, ამაში იყო, ალბათ, ბევრი რამე — პანდემიაც იყო, თვითონ პოლიტიკური სიტუაცია ქვეყანაში არსებული, დაპირისპირებები სხვადასხვა ჯგუფების, აქედან გამომდინარე ზეწოლა ცენტრალურ საარჩევნო კომისიაზე. ადამიანები ვართ და ზოგი ასე აღიქვამს და ზოგი ისე აღიქვამს. ასე რომ, ეს თვითონ მოცემულობა იყო", — განაცხადა ინჯიამ.

დღეს პარლამენტში, 2020 წლის 31 ოქტომბრის არჩევნების შემსწავლელი დროებითი საგამოძიებო კომისიის სხდომაზე ცესკოს თავმჯდომარეს, თამარ ჟვანიას მოუსმინეს.