საქარველოს სახალხო დამცველი, უჩა ნანუაშვილი მიიჩნევს, რომ საზოგადოებრივი მაუწყებლის ყოფილი ჟურნალისტისთვის, ლაშა მესხისთვის ხელშეკრულების აღარ გაგრძელება შეიძლება იყოს განსხვავებული მოსაზრების და პროფესიული კავშირის წევრობის გამო დისკრიმინაცია. ამის შესახებ ნანუაშვილმა განცხადება დღეს გაავრცელა.

"ამ ეტაპზე უცნობია, რა ლეგიტიმურ მიზანს ემსახურებოდა მხოლოდ ლაშა მესხის სამსახურიდან გათავისუფლება. ამასთან, იმ პირობებში, როდესაც ჟურნალისტი მენეჯმენტის მიმართ მის განსხვავებულ და კრიტიკულ მოსაზრებებზე და პროფესიული კავშირში აქტიურ საქმიანობაზე მიუთითებს, საზოგადოებრივ მაუწყებელს ეკისრება პასუხისმგებლობა, წარმოადგინოს განსაკუთრებით წონადი არგუმენტები და დაასაბუთოს, რომ ჟურნალისტის სამსახურიდან გათავისუფლება არ მომხდარა დისკრიმინაციული საფუძვლით," - აღნიშნულია სახალხო დამცველის განცხადებაში.

ნანუაშვილი მიიჩნევს, რომ ერთთვიანი ხელშეკრულები ვადის გასვლის გამო დასაქმებულთან თანამშრომლობის შეწყვეტა არ გამორიცხავს დისკრიმინაციის არსებობის ვარაუდს.

საზოგადოებრივი მაუწყებლის მიერ ლაშა მესხისთვის ხელშეკრულების აღარ გაგრძელების შესახებ 28 თებერვალს გავრცელდა. არხის მიმდინარე და ახალი ამბების ბლოკის დირექტორი, გიორგი გვიმრაძე ამბობდა, რომ ჟურნალისტთან თანამშრომლობის გაგრძელების შესაძლებლობას ვერ ხედავდა.