საპარლამენტო ფრაქცია შარლ მიშელის რეფორმების ჯგუფი მოსამართლეების დანიშვნის შეჩერებას ითხოვს. ამის შესახებ მათ დღეს პარლამენტში საგანგებო ბრიფინგი გამართეს და განაცხადეს, რომ მოსამართლეთა დანიშვნა იუსტიციის საბჭოს "სიღრმისეული რეფორმების" გატარებამდე უნდა შეჩერდეს.

როგორც ფრაქციის თავმჯდომარემ, ხათუნა სამნიძემ აღნიშნა, შარლ მიშელის დოკუმენტში ღიად წერია, რომ მოსამართლეების დანიშვნა უნდა შეჩერდეს.

"შეთანხმების შესაბამისად, უნდა მოხდეს იუსტიციის უმაღლესი საბჭოს სიღრმისეული რეფორმა და მხოლოდ ამის შემდეგ შეიძლება ვისაუბროთ მოსამართლეების დანიშვნებზე. დოკუმენტში მართლმსაჯულების საკითხებთან დაკავშირებით პარლამენტში ერთი შეხვედრის გარდა არ გამართულა, რაც ნიშნავს იმას, რომ ქართული ოცნება აძლევს სივრცეს კლანს რომ მოასწროს ეს დანიშვნები", — განაცხადა სამნიძემ.

გიორგი ვაშაძემ კი აქცენტი უცხოელი მოსამართლეების საქართველოში ჩამოყვანის საკითხზე გააკეთა.

"საქართველოში დადგება დრო, როდესაც მოსამართლე იქნება მართლმსაჯულების მსახური, თითოეული მოქალაქის ინტერესის მსახური და ამას ჩვენ ერთად მივაღწევთ. ჩამოვიყვანთ უცხოელ მოსამართლეებს, რათა პოლიტიკური ანგარიშსწორება ამ ქვეყანაში ერთხელ და სამუდამოდ დასრულდეს", — განაცხადა ვაშაძემ.

ფრაქციამ პარლამენტის თავმჯდომარეს ასევე მოუწოდა, იუსტიციის უმაღლესი საბჭოში არამოსამართლე წევრების დანიშვნისთვის კონკურსი გამოცხადდეს.

შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმებაში წერია, რომ არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.

მიუხედავად ამისა, მოსამართლეთა დანიშვნის პროცესი არ ჩერდება. იუსტიციის უმაღლესი საბჭო პარლამენტს უზენაესი სასამართლოს მოსამართლეობის 9 კანდიდატს წარუდგენს.