საქართველოს განათლებისა და მეცნიერების სამინისტრო თავისუფალი გაკვეთილების ახალ პროექტს იწყებს. ახალ პროექტზე კონკურსი დღეს გამოცხადდა.

სამინისტრომ სკოლებს მოუწოდა წარადგინონ პროექტები და დაიწყონ თავისუფალი გაკვეთილების დანერგვა.

განათლების სამინისტროს მიერ გავრცელებულ განცხადებაში წერია, რომ თავისუფალი გაკვეთილები გულისხმობს მოსწავლის ინტერესებზე მორგებულ კლასგარეშე/არაფორმალური აქტივობების ციკლს, რომლის შინაარსი და სწავლების მეთოდოლოგია განსხვავდება ტიპური საგაკვეთილო პროცესისაგან.

უწყების ცნობით, იგი არ ითვალისწინებს საშინაო დავალებების მომზადებას, მოსწავლის შეფასებას და მოსწავლეებს და მასწავლებლებს შემოქმედებითი აქტივობის და იდეების რეალიზების საშუალებას აძლევს.

აქტივობებისთვის, პროგრამის ფარგლებში, განისაზღვრა შემდეგი მიმართულებები:

  • სპორტული აქტივობები
  • წიგნიერების განვითარება
  • კულტურა/ხელოვნება
  • ინტელექტუალურ-შემეცნებითი აქტივობები

განათლების სამინისტროს ინფორმაციით, თავისუფალი გაკვეთილები დაფინანსდება მათ მიერ გაცემული გრანტის ფარგლებში, რომლის მიმღები იქნება სკოლა.

ერთ სკოლაზე გაცემული გრანტის მაქსიმალური ოდენობა არაუმეტეს 3 000 ლარს შეადგენს, რომელიც განაწილდება მასწავლებლების შრომის ანაზღაურებაზე, დირექცია/ადმინისტრაციის შრომის ანაზღაურებასა და პროექტების განსახორციელებლად საჭირო რესურსებზე.

2017 წელს, თავისუფალ გაკვეთილებში ჩართულები იქნებიან VII-VIII კლასის მოსწავლეები. სპორტული მიმართულების ფარგლებში წარმოდგენილ პროექტებში აქტივობები გაწერილი უნდა იყოს არაუმეტეს 40საათზე, ხოლო დანარჩენ მიმართულებებში-არაუმეტეს 20-20 საათისა.