რამდენიმე დღეა, DC-ის ფანების ყურადღება ანიმაციურმა სერიალმა Harley Quinn-მა, უფრო სწორად კი სერიალის იმ სცენამ მიიპყრო, რომელსაც მაყურებელი მესამე სეზონში ვერ იხილავს. როგორც სერიალის ერთ-ერთმა შემქმნელმა, ჯასტინ ჰალპერნმა Variety-ს განუცხადა, DC-მ სერიალიდან ბეტმენისა და ქალი-კატას ორალური სექსის სცენის ამოჭრა მოითხოვა. თუმცა ფანები ყველაზე მეტად ამ გადაწყვეტილების მიზეზმა გააოგნა.

"ჰარლის მესამე სეზონში ერთი სცენა გვქონდა, სადაც ბეტმენსა და ქალ-კატას ორალური სექსი აქვთ, თუმცა DC-მ გვითხრა: 'ამის გაკეთება არ შეიძლება, არავითარ შემთხვევაში'. მათი თქმით, გმირები ამას [კუნილინგუსს] არ აკეთებენ", — ამბობს ჯასტინ ჰალპერნი.

ჰალპერნის თქმით, DC-მ განაცხადა, რომ მსგავსი სცენა სუპერგმირის სათამაშოებისა და სხვა ნაწარმის გაყიდვებს შეუშლიდა ხელს. ამ განცხადებას სერიალის შემქმნელის გარდა, გულშემატკივრების უკმაყოფილებაც მოჰყვა. უამრავი მათგანი გადაწყვეტილებას სარკაზმით შეხვდა.

"გამორიცხულია, ბეტმენი ორალური სექსით დაკავდეს! მაგრამ იცი ვინაა ორალური სექსით დაკავებული? მომხიბვლელი მილიონერი ბრიუს ვეინი. ბეტმენმა ამ კაცისგან ერთ-ორი რამ მაინც უნდა ისწავლოს".

"ბეტმენი კლავს ადამიანებს — DC: მაგარია!

ბრიუსი ორალური სექსით კავდება — DC: ეს უკვე მეტისმეტია!"

Harley Quinn-ის პრემიერა 2019 წელს შედგა. მოზრდილებისთვის განკუთვნილმა ანიმაციურმა სერიალმა მაყურებელთა სიყვარული მალევე დაიმსახურა. DC-ისა და სერიალის შემქმნელს შორის აზრთა სხვადასხვაობის შემდეგ, ახალი, მესამე სეზონისადმი ინტერესი კიდევ უფრო გაიზარდა.