საოკუპაციო რეჟიმის მიერ დაკავებული ზაზა გახელაძის მამა, მიხეილ გახელაძე ამბობს, რომ შვილის დაბადების დღეზე, 23 ივნისს ცხინვალში გადასვლას აპირებს. მისივე თქმით, ისინი აქციის მოწყობასაც აპირებენ.

ერგნეთში ინციდენტების პრევენციისა და მათზე რეაგირების მექანიზმის შეხვედრა მიმდინარეობს. როგორც ხელისუფლების წარმომადგენლები აცხადებენ, შეხვედრის ერთ-ერთი მთავარი თემა ზაზა გახელაძის გათავისუფლება იქნება. ერგნეთში ჩასულები არიან გახელაძის მშობლებიც.

"გუშინ საელჩოების წარმომადგენლებს შევხვდით, დაგვპირდნენ, რომ ერგნეთის შეხვედრა არისო და დავაყენებთ ამ საკითხსო. ჩვენც ჩამოვედით აქ, იქნებ რამე სასიკეთო მოხდეს და ეს დაპირებები და იმედები იქნებ გამართლდეს", — განაცხადა მიხეილ გახელაძემ.

11 ივლისს ერთი წელი გავა მას შემდეგ, რაც ზაზა გახელაძე რუსმა სამხედროებმა დაატყვევეს. ის კასპში ჯერ ცეცხლსასროლი იარაღით დაჭრეს, შემდეგ კი გაიტაცეს. რუსული მხარის მტკიცებით, გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: