საოკუპაციო რეჟიმის მიერ გატაცებული ზაზა გახელაძის ცოლის, ირმა ბუთხუზის განცხადებით, აპირებენ, რომ გახელაძის საქმეზე მთავრობის მიერ ქმედითი ნაბიჯების გადადგმის მოთხოვნით ოჯახმა აქციები გამართონ.

"ეს გამოიწვია 9თვე-ნახევრის უმოქმედობამ. ეს პატარა დრო არ იყო და ხომ შეიძლებოდა, რომ შედეგი დადებულიყო?", — ამბობს ირმა ბუთხუზი On.ge-სთან.

მისივე თქმით, აქციების ზუსტი თარიღი ჯერ არაა ცნობილი, თუმცა ამას სააღდგომო დღესასწაულების შემდეგ აპირებენ, უმოქმედობის შემთხვევაში კი არ გამორიცხავს რომელიმე ქვეყანას თავშესაფარი სთხოვოს.

"ჯერ შევხედავ რას გააკეთებენ, რა დრო დასჭირდებათ, რა მოჰყვება ჩემს რეაქციას და მერე გამორიცხული მართლა აღარაფერია", — ამბობს ბუთხუზი.

ირმა ბუთხუზი, ასევე, შეხვედრას ითხოვს პრეზიდენტთან, პრემიერმინისტრთან და პარლამენტის თავმჯდომარესთან.

ზაზა გახელაძე კასპში გასული წლის 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

ოკუპირებული ცხინვალის ე.წ. სასამართლომ მას 5 თებერვალს 12 წლითა და 6 თვით უკანონო პატიმრობა მიუსაჯა.

გაიგეთ მეტი: