საგარეო საქმეთა სამინისტრო NATO-ს ბრიუსელისსამიტს ეხმაურება და "უაღრესად მნიშვნელოვანს" უწოდეს, რომ კომუნიკეში დადასტურებულია ბუქარესტის სამიტის გადაწყვეტილება და საქართველოს აქვს ყველა "პრაქტიკული ინსტრუმენტი, რათა მოემზადოს საბოლოო წევრობისთვის".

"მისასალმებელია, ალიანსის წევრი ქვეყნების მხრიდან ცალსახა და პირდაპირი დადასტურება, რომ ისინი მხარს უჭერენ საქართველოს სუვერენულ უფლებას აირჩიოს საგარეო პოლიტიკური პრიორიტეტები და რომ დაუშვებელია ნებისმიერი მესამე მხარის ჩარევა ამ პროცესში. ნიშანდობლივია, რომ წევრი ქვეყნები ცალსახად პოზიტიურად აფასებენ საქართველოს, როგორც ასპირანტი ქვეყნის მიერ მიღწეულ პროგრესს სხვადასხვა მიმართულებით რეფორმების განხორციელების კუთხით და ხაზს უსვამენ საქართველოს შესაძლებლობას ღირსეული წვლილი შეიტანოს საერთო ევრო-ატლანტიკურ უსაფრთხოებაში", — ნათქვამია საგარეო საქმეთა სამინისტროს განცხადებაში.

ბრიუსელის სამიტის ფარგლებში NATO-ს წევრმა სახელმწიფოებმა ერთობლივი კომუნიკე გაავრცელეს, რომელშიც საქართველოსა და მის წევრობასაც განიხილავენ. კომუნიკეში ალიანსის წევრი სახელმწიფოები ადასტურებენ, რომ საქართველო გახდება NATO-ს წევრი.

"ჩვენ ვადასტურებთ გადაწყვეტილებას, რომელიც მიღებულ იქნა 2008 წელს ბუქარესტის სამიტზე იმის შესახებ, რომ საქართველო გახდება ალიანსის წევრი გაწევრიანების სამოქმედო გეგმასთან (MAP) ერთად, როგორც პროცესის განუყოფელი ნაწილი", — აღნიშნულია კომუნიკეში.