სერიალების მოყვარულების დიდხნიანი ლოდინი დასასრულს უახლოვდება.

როგორც იქნა, Apple-მა თავისი ბოლო დროის ერთ-ერთი ყველაზე გახმაურებული სერიალის The Morning Show (დილის გადაცემა) მეორე სეზონის ტრეილერი გამოაქვეყნა, რომელიც ერთგულ მაყურებლებს კიდევ უფრო დაძაბულ და დამაინტრიგებელ სანახაობას ჰპირდება.

ცნობილი გახდა პრემიერის თარიღიც: დილის გადაცემა ახალი სეზონით 17 სექტემბერს დაბრუნდება.

ახალი სეზონი ახალი სამსახიობო გუნდით ბრუნდება ეკრანებზე: პირველი სეზონიდან უკვე კარგად ნაცნობ სახეებთან ერთად (ჯენიფერ ენისტონი, რიზ უიზერსპუნი თუ სტივ კარელი), ვიხილავთ ისეთ ახალ მსახიობებსაც, როგორებიც ჯულიანა მარგულისი, ვალერია გოლინო და ჰოლანდ ტეილორი არიან.

მეორე სეზონში მოვლენები ძირითადად კვლავ ჯენიფერ ენისტონისა და რიზ უიზერსპუნის პერსონაჟების ირგვლივ განვითარდება და იმ შედეგებზე მოგვითხრობს, რაც მათმა საერთო თამამმა გადაწყვეტილებებმა მოიტანა.

დილის გადაცემის მომავალ სეზონში სულ ათი ეპიზოდი იქნება და 17 სექტემბრიდან ყოველკვირეულად თითოეულის პრემიერა შედგება.