ჩრდილოეთ კორეის ლიდერს ახალი მტერი გამოუჩნდა.

The New York Times-ის ინფორმაციით, კიმ ჩენ ინმა ბოლო პერიოდში მთელ მსოფლიოში უზომოდ გაპოპულარულებულ მუსიკალურ ჟანრს K-Pop (კორეული პოპი) "აგრესიული კიბო" უწოდა.

მისი აზრით, ეს მუსიკალური მიმდინარეობა საფრთხეს უქმნის ჩრდილოკორეელ ახალგაზრდებს, ამიტომაც აპირებს, გაამკაცროს სასჯელი მათ წინააღმდეგ, ვინც სამხრეთკორეულ ფილმებს, სერიალებს ან ვიდეოკლიპებს უყურებს.

ჩრდილოეთ კორეის სახელმწიფო მედია აქამდეც გამოირჩეოდა ცენზურისკენ მოწოდებით, თუმცა ბოლო პერიოდში ხელისუფლების მიერ მართულ ადგილობრივ გაზეთებში სულ უფრო ხშირად საუბრობენ "ანტისოციალისტურ" გავლენებზე, რაც ახალგაზრდებში "მეტყველების, ქცევის, ჩაცმისა და ვარცხნილობის სტილში" გამოიხატება.

კორეული პოპის ერთ-ერთი ყველაზე ცნობილი წარმომადგენელი ჯგუფი - BTS.

ფოტო: HYBE

კორეული პოპის ერთ-ერთი ყველაზე ცნობილი წარმომადგენელი ჯგუფი - Blackpink.

ფოტო: Samsung/Handout

ამის გამო კიმ ჩენ ინმა გასცა ბრძანება, რომ მსგავსი "საფრთხის შემცველი ტენდენციები" მაქსიმალურად გაკონტროლდეს და აიკრძალოს: მაგალითად, ცოტა ხნის წინ ჩრდილოეთ კორეაში აიკრძალა ვიწრო ჯინსები, სხეულის პირსინგები და თმის სხვადასხვა ვარცხნილობა, როგორც "კაპიტალისტური ცხოვრების სტილის" სიმბოლო.

ჩრდილოეთ კორეაში უკვე 70 წელზე მეტია მსოფლიოში ერთ-ერთი ყველაზე რეპრესიული ავტორიტარული რეჟიმია დამყარებული.