დიდი ბრიტანეთის საგარეო საქმეთა მინისტრის, დომინიკ რააბის განცხადებით, ზოგიერთი ქვეყანა ვაქცინას დიპლომატიურ იარაღად იყენებს, რათა თავისი გავლენა გააძლიეროს. ამის შესახებ რააბმა Reuters-ს ესაუბრა.

დასავლელი დიპლომატების ნაწილი შიშობს, რომ რუსეთი და ჩინეთი იყენებენ ვაქცინებს, რათა გავლენა მოიპოვონ, განსაკუთრებით კი ღარიბ ქვეყნებში, სადაც ვაქცინების წარმოებისა და შეძენის საშუალება არ აქვთ.

კითხვაზე შეშფოთებულია თუ არა რააბი იმით, რომ ჩინეთი და რუსეთი შესაძლოა, ვაქცინას ძალაუფლებაზე ცვლიდნენ, მინისტრი პასუხობს:

"ეჭვი არაა, რომ რაღაც ასეთი ხდება და ჩვენ მხარს არ ვუჭერთ ვაქცინის დიპლომატიას, რომ არაფერი ვთქვა შანტაჟზე".

დიდ ბრიტანეთში, კორნუელის საგრაფოში დიდი შვიდეულის სამიტი მიმდინარეობს. პრემიერმინისტრი, ბორის ჯონსონი იმედოვნებს, რომ სხვა ლიდერები დათანხმდებიან, ღარიბი ქვეყნებისთვის მილიარდი დოზა ვაქცინა გაიღონ და მომავალი წლის ბოლოსთვის აცრაში დაეხმარონ.

დომინიკ რააბის თქმით, დიდი ბრიტანეთის წვლილი არ იქნება დაკავშირებული რაიმე ვალდებულებთან და ვაქცინის 80 პროცენტი COVAX პლატფორმის ფარგლებში გავრცელდება. დანარჩენი კი "სტრატეგიულად ახლო ქვეყნებს" გადაეცემათ.