საქართველოს შინაგან საქმეთა სამინისტროს ობიექტების დაცვის დეპარტამენტის 50 თანამშრომელი საქმიანობას აღარ ასრულებს. შსს-ს პრესსამსახურის ინფორმაციით, ეს თანამშრომლები ე.წ. "კადრების განყოფილებაში" აიყვანეს, რაც ნიშნავს, რომ ისინი უწყების რიგებში კვლავ ირიცხებიან, თუმცა, გაფრთხლებულები არიან სამსახურიდან გათავისუფლების შესახებ.

"ისინი ოთხი თვის განმავლობაში კადრების განკარგულებაში იქნებიან, ხოლო ორი თვის განმავლობაში მათ შეუნარჩუნებათ თანამდებობრივი სარგო," - განმარტავენ შსს-ს პრესსამსახურში, რომელთა ინფორმაციითაც ოთხი თვის განმავლობაში ე.წ. "კადრების განყოფილებაში" მოხვედრილი პირები თანამდებობებზე კვლავ განიხილებიან.

დღეს, საზოგადოებრივი მაუწყებლის პირველმა არხმა, უწყების თანამშრომლებზე დაყრდნობით, ინფორმაცია გაავრცელა, რომ შსს-ს ობიექტების დაცვის დეპარტამენტის 50 თანამშრომელი, ყოველგვარი წინასწარი გაფრთხილებისა და განმარტების გარეშე, სამსახურიდან გაათავისუფლეს.