საპატრიარქო ტახტის მოსაყდრე, სენაკისა და ჩხოროწყუს მიტროპოლიტის, შიოს (მუჯირი) განცხადებით, გვიან ღამით თურქეთიდან რეანიმატოლოგი ჩამოვა. მიტროპოლიტის ინფორმაციით, პატრიარქი "მცირედ უკეთესად არის".

"ახალს ვერაფერს ვერ გეტყვით. თურქეთიდან ღამის 01:00 საათისთვის ველოდებით რეანიმატოლოგს. ამჟამად მიმდინარეობს იგივე თერაპია, რომელიც აქამდე იყო დანიშნული. ელოდებიან, როგორი დინამიკა იქნება პატრიარქის მდგომარეობის იმისთვის, რომ განსაზღვრონ შემდგომი მოქმედება. მთავარია, ყველამ ვილოცოთ, მთელმა საქართველომ, მისი ჯანმრთელობისთვის.

ჯერჯერობით მეტი არაფერი ვიცი, ჩვენც ველოდებით ახალ ინფორმაციას. ვფიქრობ, საღამოს რაღაც გვეცოდინება. როგორც ვიცი, არის მცირედი უკეთესობა," — განაცხადა საპატრიარქო ტახტის მოსაყდრე შიომ ილია II-ის ჯანმრთელობის მდგომარეობაზე.

შეგახსენებთ, ილია II-ის ჯანმრთელობის მდგომარეობა წუხელ გვიან ღამით გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს.

ექიმ ვახტანგ კალოიანის შეფასებით, პატრიარქის ჯანმრთელობის მდგომარეობა კვლავ კრიტიკულია და გულის მუშაობის და წნევის შესანარჩუნებლად რამდენიმე მედიკამენტზე იმყოფება.