"ბელორუსის პრეზიდენტმა, ალექსანდრე ლუკაშენკომ, სამძიმრის წერილი გაუგზავნა საქართველოს პრეზიდენტს, მიხეილ ყაველაშვილს, სრულიად საქართველოს კათოლიკოს-პატრიარქ ილია II-ის გარდაცვალების გამო", — ამის შესახებ ცნობას ბელარუსის პრეზიდენტის ადმინისტრაცია ავრცელებს.

ლუკაშენკოს თქმით, ბელარუსმა ამ გამოჩენილი ქართველი რელიგიური და საზოგადო მოღვაწის გარდაცვალების შესახებ ინფორმაცია ღრმა მწუხარების განცდით მიიღო.

"მისმა უწმინდესობამ და უნეტარესობამ ილია II-მ მთელი თავისი ცხოვრება მაღალ იდეალებს მიუძღვნა, ემსახურებოდა არა მხოლოდ თავის ხალხს, არამედ მთელ კაცობრიობას. მშვიდობის, უსაფრთხოების, მეგობრობისა და რელიგიათაშორისი ურთიერთგაგების განმტკიცებისკენ მიმართული ინიციატივებით, პატრიარქმა განსაკუთრებული ადგილი დაიმკვიდრა მილიონობით ადამიანის გულში, მიუხედავად მათი ეროვნებისა და რელიგიური კუთვნილებისა", — ნათქვამია სამძიმრის წერილში.

"მისი უწმინდესობის, ილია II-ის მრავალწლიანმა მსახურებამ გააძლიერა საქართველოს მართლმადიდებლური ეკლესია და წვლილი შეიტანა ასობით ეკლესიისა და მონასტრის აღდგენასა და გახსნაში", — წერს ის. ალექსანდრე ლუკაშენკომ ასევე გულწრფელი სამძიმარი გამოუცხადა საქართველოს მართლმადიდებელ ეკლესიას და მთელ საქართველოს.