როდესაც ედმუნდ კინგსლიმ და ანა მორისეიმ შვილს მე-6 დაბადების დღის აღსანიშნავად სასურველი ტორტის შესახებ ჰკითხეს, გოგონამ განაცხადა, რომ მის ტორტზე ენ ბოლეინის თავის მოკვეთის სცენა უნდა ყოფილიყო გამოსახული. მშობლებს გოგონას უცნაური პასუხი დიდად არ გაჰკვირვებიათ, რადგან შვილის ისტორიისადმი სიყვარული კარგად მოეხსენებათ.

გოგონას მამა ამბობს, რომ გოგონას ენ ბოლეინის, ჰენრი VIII-ისა და ტიუდორების ისტორიით დაინტერესება ზამთრის არდადაგებზე ჰემპტონ კორტის სასახლეში სტუმრობამ განაპირობა. ოჯახი იქ ციგურებზე სასრიალოდ წავიდა. მამამ გოგონას სასახლეში მცხოვრები ისტორიული ფიგურების შესახებ უამბო, რამაც გოგონა აღაფრთოვანა.

"მგონი, პირველი მარცვალი სწორედ მაშინ დაითესა, როდესაც სასახლე ნახა და იქ დაუვიწყარი დრო გაატაარა. ის ძალიან დაინტერესდა დიდი, მსუქანი და საშინელი მეფით, რომელსაც 6 ცოლი ჰყავდა", — ამბობს კინგსლი.

მშობლებმა გოგონას მოთხოვნის შესრულება გადაწყვიტეს. წყვილი ტორტს 3 დღის განმავლობაში ქმნიდა, თუმცა შედეგის გამო წვალება ნამდვილად ღირდა. ოჯახმა დაბადების დღე კოვიდრეგულაციების დაცვით პარკში, ვიწრო წრეში აღნიშნა.

ტორტი საზოგადოებას გოგონას მამამ ტვიტერის მეშვეობით გააცნო:

"ხვალ ის 6 წლის გახდება და, როგორც ამ ასაკის უამრავმა სხვა გოგომ, მანაც მოითხოვა ტორტი, რომელზეც მომავალი დედოფალი ელიზაბეთ I ჰენრი VIII-ის მიერ ენ ბოლეინისთვის თავის მოკვეთის სცენას უყურებს".

ტორტმა, რა თქმა უნდა, მომხმარებელთა განსაკუთრებული ყურადღება დაიმსახურა. ზოგიერთმა მათგანმა გოგონას მშვენიერი იდეისთვის მადლობაც კი გადაუხადა.

ამავე თემაზე: