მიმდინარე წლის მაისში, გასული წლის იმავე თვესთან შედარებით, საქართველოში უცხოეთიდან 188%-ით მეტი, 104 755 ვიზიტი განხორციელდა — ტურისტთა ეს რაოდენობა პანდემიის პერიოდში უპრეცენდენტოდ მაღალია. თუმცა, აქვე უნდა აღინიშნოს, რომ ეს მაჩვენებელი 2019 წლის იმავე პერიოდის მონაცემს 83,1%-ით ჩამორჩება.

მაისში განხორციელებული უცხოური ვიზიტების 92% ტურისტული ტიპის იყო — ეს ნიშნავს იმას, რომ ვიზიტორებმა საქართველოში მოგზაურობისას მინიმუმ ერთი ღამე გაათენეს. ასევე, აღსანიშნავია, რომ მთლიანი ვიზიტების ნახევარზე მეტი, 50,3% საჰაერო გზით განხორციელდა, რაც საქართველოში საჰაერო მიმოსვლის გააქტიურებაზე მიანიშნებს.

მაისში უცხოური ვიზიტები TOP 10 ქვეყნის მიხედვით ასე გადანაწილდა:

  1. თურქეთი — 21 855 ვიზიტი, ზრდა 2020 წლის იმავე თვესთან — 38%;
  2. უკრაინა — 11 533 ვიზიტი, ზრდა — 1 050%;
  3. ისრაელი — 11 244 ვიზიტი, ზრდა — 24 887%;
  4. რუსეთი — 10 818 ვიზიტი, ზრდა — 186%;
  5. სომხეთი — 9 863 ვიზიტი, ზრდა — 26%;
  6. საქართველო (არარეზიდენტები) — 9 537 ვიზიტი, ზრდა — 388%;
  7. აზერბაიჯანი — 5 704 ვიზიტი, ზრდა — 74%;
  8. ყაზახეთი — 4 664 ვიზიტი, ზრდა — 1 147%;
  9. უზბეკეთი — 2 528 ვიზიტი, ზრდა — 690%;
  10. ბელარუსი — 2 349 ვიზიტი, ზრდა — 216%;

რაც შეეხება მიმდინარე წლის პირველი ხუთი თვის მონაცემებს, სტატისტიკა აჩვენებს, რომ 2021 წლის იანვარ-მაისში საქართველოში სულ 317 462 უცხოური ვიზიტი განხორციელდა, რაც გასული წლის იმავე პერიოდის მონაცემს 73,3%-ით ჩამორჩება.

შეგახსენებთ, რომ საკოორდინაციო საბჭოს გადაწყვეტილებით, პირველი ივნისიდან საქარველოს სახმელეთო საზღვრები გაიხსნა. ასევე, გაიზარდა იმ ქვეყნების ჩამონათვალი, რომელთა მოქალაქეებს ან რეზიდენტებსაც, 72 საათის განმავლობაში აღებული PCR ტესტით საქართველოში შემოსვლა შეეძლებათ.