ეკონომიკის მინისტრის, ნათია თურნავას განცხადებით, "ბატონი ბიძინა" ბოლო დროს გაკეთებული განცხადებების გამო იძულებული გახდა, "საკმაოდ მკვეთრი შეფასებით" ეპასუხა. კერძოდ, ნათია თურნავა ამბობს, რომ გიორგი გახარიას გუნდი ივანიშვილის სახელს იყენებს და მოსახლეობას აწვდის ინფორმაციას, თითქოს ის ივანიშვილის პროექტია.

"საზოგადოებას მოეხსენება, ჩვენს პარტნიორებსაც, მოსახლეობასაც, რომ ბატონი ბიძინა ივანიშვილი დიდი ხანია უკვე დისტანცირებულია პოლიტიკიდან, აქტიურად არანაირი ფორმით არ მონაწილეობს პოლიტიკურ პროცესში და როგორც ჩანს, ამ ბოლო დროს გაკეთებულმა განცხადებებმა იძულებული გახადა ბატონი ბიძინა, რომ ასეთი განცხადებით, საკმაოდ მკვეთრი შეფასებით ეპასუხა. ამის ერთ-ერთი მიზეზი არის ის ინფორმაცია, რომ ყოფილი პრემირმინისტრის, ბატონი გახარიას პარტია იყენებს მის სახელს და აწვის მოსახლეობას ინფორმაციას, რომ თითქოსდა, ის არის ბიძინა ივანიშვილის ე.წ. პროექტი, რაც აბსოლუტურად არ შეესაბამება სიმართლეს. ამიტომაც მოხდა ასეთი მკვეთრი შეფასების მიცემა, რაც ასახულია ბატონი ბიძინას განცხადებაში. მათ შორის, მან ეს გადაწყვეტლება და გადადგომის საქციელი შეაფასა ღალატის ტოლფას საქციელად", — თქვა თურნავამ მთავრობის სხდომის შემდეგ.

ჟურნალისტებმა მას ჰკითხეს, თავად როგორ აფასებს გახარიას გადადგომას. გახარიას მინისტრთა კაბინეტის აწ უკვე ყოფილი წევრი ამბობს, რომ ექსპრემიერის გადაწყვეტილება ბრძოლის ველის დატოვება იყო.

"ძალიან მნიშვნელოვანი არის ის, რა მომენტში მოხდა გადადგომა. გადადგომა მოხდა საკმაოდ დინამიურ და რთულ მომენტში, როდესაც იყო პოლიტიკური დაძაბულობა, პოლიტიკური კრიზისი. ასეთ დროს განსაკუთრებული პასუხისმგებლობა ეკისრება სახელისუფლებო გუნდს მთლიანად და რა თქმა უნდა, მის ხელმძღვანელს, ბატონ პრემიერმინისტრს. ასეთ დროს გადადგომა არის ბრძოლის ველის დატოვება", — განაცხადა თურნავამ.

აღსანიშნავია, რომ გახარიას გუნდის წევრების მიერ თითქოსდა გავრცელებულ ინფორმაციაზე ისაუბრა კიდევ ერთმა მინისტრმა, თეა წულუკიანმა. მისი თქმით, პარტიულ აქტივში და რეგიონებში ისინი ამბობენ, რომ მხარდაჭერილნი არიან ქართული ოცნებისა და ბიძინა ივანიშვილის მიერ, რაც სიცრუეა. მინისტრის განცხადებით, "როგორც ჩანს, ამგვარმა ქმედებამ მიიყვანა ბიძინა ივანიშვილი იქამდე, რომ ეს პოლიტიკიდან წასული კაცი გამოდის და იძახის, რომ მისი სახელის გამოყენება არის დაუშვებელი".

დღეს, 7 ივნისს, ქართული ოცნების ყოფილმა თავმჯდომარემ, ბიძინა ივანიშვილმა განცხადება გაავრცელა და ყოფილი თანაგუნდელი, გიორგი გახარია გააკრიტიკა. ის ამბობს, რომ იმედგაცრუებულია და ექსპრემეირს გუნდისა და ქვეყნის მოღალატეს უწოდებს, მის საქციელს კი პოლიტიკურ დანაშაულად აფასებს.