აფრიკული გიგანტური ვირთხა, სახელად მაგავა 5-წლიანი მუშაობის შემდეგ დამსახურებულ პენსიაზე გადის. ამ დროის განმავლობაში მაგავამ კამბოჯაში 71 ნაღმსა და 38 აუფეთქებელ საბრძოლო მასალას ყნოსვით მიაგნო. ამ დამსახურებისთვის ცოტა ხნის წინ მას ბრიტანულმა ვეტერინარულმა საქველმოქმედო ორგანიზაციამ, PDSA-მ მედალი "სიცოცხლის გადამრჩენელი მოვალეობისადმი ერთგულებისთვის" უბოძა.

მაგავა ბელგიური საქველმოქმედო ორგანიზაცია APOPO 1 წლის განმავლობაში ნაღმების აღმოჩენის მიზნით წვრთნიდა. ნაღმის აღმოსაჩენად მაგავას მთავარი იარაღი ყნოსვაა.

მაგავა ტანზანიაში დაიბადა და გაიზარდა. ის 1.2 კილოგრამს იწონის და სიგრძეში 70 სანტიმეტრია. მართალია მღრღნელი ჩვეულებრივ ვირთხებთან შედარებით დიდია, თუმცა ის მაინც საკმარისად პატარაა იმისთვის, რომ ნაღმზე გადარბენის შემთხვევაში მისი აფეთქება არ გამოიწვიოს. ამ სამუშაოს გიგანტური მღრღნელები ადამიანებზე გაცილებით სწრაფად და კოხტად ასრულებენ.

მაგავა APOPO-ს ყველაზე წარმატებული მღრღნელია, თუმცა 2013 წელს დაბადებულს წლების განმავლობაში მუხლჩაუხრელი შრომის შემდეგ დასვენება სჭირდება. სწორედ ამიტომ მამაცი მღრღნელი პენსიაზე გადის და დარწმუნებული ვართ, საყვარელი სასუსნავები — ბანანი და მიწის თხილი არ მოაკლდება.

ამავე თემაზე: