3 ივნისს ისრაელში იერუსალიმის ყოველწლიური გეი პრაიდი გაიმართა. მსვლელობას, რომლის მოწოდებაც თანასწორობისა და ლგბტქ თემის უფლებების დაცვა იყო, 7 500 ადამიანი დაესწრო. ამასთან, პრაიდზე მობილიზებული იყო 3 000-ზე მეტი პოლიციელიც, რადგან რამდენიმე წლის წინ მსგავსი ღონისძიების მონაწილეებს თავს დაესხნენ.

იერუსალიმის წლევანდელი პრაიდი 2015 წლის ღონისძიებაზე დაღუპული 16 წლის შირა ბანკისადმი პატივის მისაგები ლოცვით დაიწყო. ბანკის მაშინ ულტრაორთოდოქსი ექსტრემისტები დაესხნენ თავს, რის შემდეგაც გოგო მიყენებული დაშავებებისგან გარდაიცვალა. შირას პატივი მსვლელობის გზაზეც მიაგეს მისი მკვლელობის ადგილას.

2,5-კილომეტრიანი მარში ქალაქში ნაშუადღევს, თავისუფლების ზარის პარკიდან დაიწყო და დამოუკიდებლობის პარკამდე გაგრძელდა. ამ მსვლელობით სიმბოლურად აღინიშნა ისრაელში პრაიდის თვესთან დაკავშირებული ღონისძიებების დაწყება.

ფოტო: Jpost

კოვიდპანდემიის გამო, გასულ წელს იერუსალიმის პრაიდი არ გამართულა. უსაფრთხოების ზომებიდან გამომდინარე, მსვლელობის მასშტაბური დაგვირგვინება დამოუკიდებლობის პარკში წელსაც გაუქმდა.

თუმცა, უსაფრთხოების ზომები მხოლოდ კორონავირუსისგან თავდაცვას არ ეხებოდა. მსვლელობის პარალელურად ულტრამემარჯვენე და ჰომოფობიურად განწყობილი ადამიანების მცირე ჯგუფი საპროტესტო აქციას მართავდა. ღონისძიებამდე ერთი დღით ადრე კი პოლიციამ დააკავა კაცი, რომელიც პრაიდის მონაწილეებს მკვლელობით ემუქრებოდა.

წლევანდელ ღონისძიებაზე მონაწილეებმა ასევე გააპროტესტეს ქნესეთში (ისრაელი საკანონმდებლო ორგანო) ჰომოფობიურად განწყობილი კანონმდებლების ყოფნა.

ფოტო: Jpost

იერუსალიმის გეი პრაიდს საკუთარ ფეისბუქგვერდზე გამოეხმაურა ისრაელის ელჩი საქართველოში, რან გიდორიც.

"წმინდა ქალაქში, ისრაელის დედაქალაქ იერუსალიმში, სადაც თანაცხოვრობს ებრაელი, არაბი, ასევე რელიგიური თუ სეკულარული მოსახლეობა, რომელიც წმინდა ადგილია ებრაელი, მუსლიმი და ქრისტიანი მომლოცველებისთვის, გუშინ გაიმართა ღირსების მარში, პირველად, კოვიდპანდემიის შემდეგ", — წერს გიდორი.

პოსტის კომენტარებში ის ასევე აღნიშნავს, რომ მათი, როგორც ისრაელელი დიპლომატების ვალდებულებაა, ხელი შეუწყონ თანასწორობისა და მეგობრობის ღირებულებების გავრცელებას.

ისრაელი ლგბტქ უფლებების მხარდაჭერის თვალსაზრისით ახლო აღმოსავლეთის ყველაზე პროგრესულ ქვეყანად მიიჩნევა. მიუხედავად ადგილობრივი საზოგადოების ნაწილში ტრადიციული, მათ შორის, რელიგიური მსოფლმხედველობის გავლენისა, თელ-ავივ-იაფაში ყოველწლიურად ერთ-ერთი ყველაზე მასშტაბური პრაიდი იმართება, რომელსაც ასიათასობით ადამიანი ესწრება. პრაიდის თვის აღსანიშნავად, გასულ წელს ქალაქის მერმა, რონ ხულდაიმ, განაცხადა, რომ თელ-ავივში ერთი და იმავე სქესის მქონე წყვილების კავშირები ოფიციალურად გაფორმდებოდა.