საქსტატი: 2024 წელს საქართველოში სიღარიბის ზღვარს ქვევით მყოფი მოსახლეობის წილი 2.4%-ით შემცირდა

2024 წელს საქართველოში სიღარიბის აბსოლუტურ ზღვარს ქვევით მყოფი მოსახლეობის წილი (აბსოლუტური სიღარიბის მაჩვენებელი) წინა წელთან შედარებით 2.4%-ით შემცირდა და 9.4% შეადგინა, ამის შესახებ ინფორმაციას საქართველოს სტატისტიკის ეროვნული სამსახური ავრცელებს.

მათი ცნობით, 2024 წელს აბსოლუტური სიღარიბის მაჩვენებელი ქალაქის ტიპის დასახლებებში 1.6%-ით შემცირდა და 7.8% შეადგინა, ხოლო სოფლის ტიპის დასახლებებში 3.7% პუნქტით შემცირდა და 11.9%-ს გაუტოლდა.

2024 წელს, სიღარიბის აბსოლუტური მაჩვენებელი წინა წელთან შედარებით შემცირებულია მოსახლეობის ყველა ასაკობრივ ჯგუფში. კერძოდ, 18 წლამდე ასაკობრივ ჯგუფში მაჩვენებელმა 12.1% შეადგინა (-4.0%), 18-64 წლის ასაკობრივ ჯგუფში — 9.3% (-2.1%), ხოლო 65 წლის და უფროს ასაკობრივ ჯგუფში - 6.7 პროცენტი (-1.3%). აბსოლუტური სიღარიბის მაჩვენებელი, როგორც ქალებისათვის, ასევე კაცებისათვის, შემცირებულია 2.4%-ით და შესაბამისად 9.0 და 9.8% შეადგინა.

საქსტატი ავრცელებს დიაგრამას, სადაც წარმოდგენილია სიღარიბის აბსოლუტურ ზღვარს ქვევით მყოფი მოსახლეობის წილი, 2010-2024 წლებში.