კოალიცია ცვლილებისთვის ერთ-ერთი ლიდერი ნიკა მელია სოციალურ ქსელში წერს, რომ არ აპირებს ხვალინდელ სასამართლო პროცესზე მისვლას.

"დღევანდელი პროცესზე არც პროკურორები მივიდნენ. "მოსამართლემ' შემდეგი სხდომა ხვალ, 14:00 საათზე ჩანიშნა, მიუხედავად იმისა, რომ ადვოკატმა მისი სხვა პროცესების გამო, ორშაბათისთვის ითხოვა გადატანა — არც ხვალ მივალ," — წერს ნიკა მელია.

ნიკა მელიას ქართული ოცნების პარლამენტის დროებით საგამოძიებო კომისიაზე არ გამოცხადებას ედავებიან. მელიას განცხადებით, კომისიაზე გამოუცხადებლობისთვის დაწესებული 50 000-ლარიანი ჯარიმის გადახდას არ აპირებს.

ნიკა მელიას ბრალდება სისხლის სამართლის კოდექსის 349-ე მუხლით წარედგინა, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს. ამ მუხლით ბრალდებული ყოფილი თავდაცვის მინისტრი ირაკლი ოქრუაშვილი და "კოალიცია ცვლილებებისთვის" ლიდერი ზურაბ გირჩი ჯაფარიძე დაკავებული არიან.