ჰეილი ბიბერის კოსმეტიკისა და კანის მოვლის ბრენდი rhode ბიუჯეტური მაკიაჟის გიგანტმა, e.l.f. Beauty-მ ისტორიული შეთანხმების ფარგლებში 1 მილიარდ დოლარად შეიძინა.

ეს e.l.f.-ის ისტორიაში ყველაზე დიდი შენაძენია და მნიშვნელოვნად აღემატება 2023 წლის შეთანხმებას, რომლითაც კომპანიამ კანის მოვლის ბრენდი Naturium 355 მილიონ დოლარად იყიდა.

ბრენდი rhode ჰეილი ბიბერმა 2022 წელს დააარსა. კომპანიამ მალევე მოიპოვა თავბრუდამხვევი პოპულარობა — გასული ფინანსური წლის განმავლობაში rhode-მა 212 მილიონი დოლარის წმინდა გაყიდვები დააგროვა. წლის დასაწყისში კი კომპანიამ განაცხადა, რომ მისი პროდუქცია უკვე ხელმისაწვდომი იქნება Sephora-ს ჩრდილოეთ ამერიკასა და გაერთიანებულ სამეფოში მდებარე მაღაზიებში, რაც კოსმეტიკური ბრენდებისთვის დიდი წარმატებაა.

ფოტო: rhode

კომპანიის განცხადებით, ბიბერი დარჩება rhode-ის კრეატიული ხელმძღვანელისა და ინოვაციების დირექტორის როლში.

მძლავრი სოციალური მედიის მარკეტინგითა და ჰეილი ბიბერის ციფრული გავლენით როგორც ჯასტინ ბიბერთან ქორწინებამდე, ისე მის შემდეგაც, rhode-ს "ჩართულობის უძლიერესი მოდელი" აქვს — განაცხადა e.l.f.-მა ოთხშაბათს, შენაძენის შესახებ განცხადების შემდეგ გამართულ შეხვედრაზე. ბრენდის თაყვანისმცემლები საათობით დგანან რიგში rhode-ის ღონისძიებებზე დასასწრებად, ხოლო მისი პროდუქცია ონლაინ მაღაზიებში მუდამ სრულად იყიდება.

"ერთ-ერთი რამ, რაც ძალიან მოგვწონს rhode-ში, არის ის, თუ რამდენად მკაფიოდაა ჩამოყალიბებული პროდუქციის ასორტიმენტი — ბრენდი მხოლოდ 10 პროდუქტს გვთავაზობს კანის მოვლის, დეკორატიული კოსმეტიკისა და აქსესუარების კატეგორიებში," — განაცხადა e.l.f.-ის გენერალურმა დირექტორმა ტარანგ ამინმა იმავე შეხვედრაზე.

ოფიციალური ინფორმაციით, e.l.f. Beauty დათანხმდა გადაიხადოს 600 მილიონი დოლარი ნაღდი ფულის სახით, 200 მილიონი — აქციებით, ხოლო 200 მილიონ დოლარს კომპანია იმის მიხედვით გადაიხდის, თუ რა შედეგს დადებს Rhode მომდევნო სამი წლის განმავლობაში.