პატრიარქის დაცვის ყოფილი უფროსი სოსო ოხანაშვილი გადაცემა არჩევანში საუბრისას იხსენებს ციანიდის საქმის მოწმესთან, ირაკლი მამალაძესთან შეხვედრას. იგი არ გამორიცხავს, რომ პროკურატურის მოწმემ მისი საუბარი ფარულად ჩაიწერა, მაშინ როცა პირადად შეხვდა:

"არ გამოვრიცხავ. არის ამაზე საუბარი, რომ მეც ვარ იმ ჩანაწერებში".

სოსო ოხანაშვილის თქმით, ის ირაკლი მამალაძეს მხოლოდ ერთხელ შეხვდა, თუმცა მისივე მტკიცებით, საუბრის შინაარსი არ ახსოვს:

"მე მას ერთხელ შევხვდი. მამა გიორგიმ ვისადილოთო, რესტორანში გადავედი და იქ ვნახე ეს პიროვნება პირველად, ცოტა ხნით და მერე წამოვედი. ვერ გავიხსენებ კონკრეტულად, თუმცა [გერმანიაში] წასვლამდე დაახლოებით ერთი თვით ადრე იყო, იანვარში ან დეკემბერში. ძირითადი საუბარი, რაც შეიძლება მას ჩაეწერა, ის იქნებოდა რომ ვიღაც ვიღაცებს ვაყენებ სიტყვიერ შეურაცხყოფას".

ციანიდის საქმის მოწმემ ირაკლი მამალაძემ, დღეს, ტელეკომპანია პირველის ეთერში, ინგა გრიგოლიას საავტორო გადაცემაში რეაქცია განაცხადა, რომ მკვლელობას ჯგუფი ამზადებდა და სხვებიც არიან იმ ჩანაწერში, რომელიც პროკურატურას გადაეცა.

ამასთან, პროკურატურის მთავარმა მოწმემ არც უარყო და არც დაადასტურა, ინფორმაცია იმაზე, არის თუ არა აღნიშნულ ჩანაწერში პატრიარქის დაცვის ყოფილი უფროსი სოსო ოხანაშვილი, რომელიც გამოძიებამ უკვე დაკითხა.