ინტერნეტსივრცეში ერთ-ერთი ყველაზე პოპულარული ვიდეო — "ჩარლიმ თითზე მიკბინა" — რამდენიმე დღის წინ აუქციონზე $760 999-ად გაიყიდა. თავდაპირველად 2007 წელს გამოქვეყნებული და ვირუსულად გავრცელებული ვიდეო, რომელსაც დღეს 885 მილიონი ნახვა აქვს, NFT-ად (Non-Fungible Token) იქცა და ამგვარად გადაეცა მის ახალ მფლობელს.

ძმების განცხადებით, ვიდეოს გაყიდვით მიღებული თანხით ისინი უნივერსიტეტში სწავლას დაიფინანსებენ.

უფროსი ძმის, ჰარის თქმით, რომელიც ახლა 17 წლისაა, მას ლონდონის ორი უნივერსიტეტიდან რომელიმეში ინჟინერიის სწავლა სურს. ვიდეოს მეორე მთავარი გმირი, 15 წლის ჩარლი, ჯერ არ ჩამოყალიბებულა საკუთარ კარიერულ არჩევანზე, თუმცა, ამბობს, რომ ვიდეოს გაყიდვით მიღებული ფულით თავისი ორი უმცროსი ძმის, ჯესპერისა და რუპერტის, უნივერსიტეტში სწავლაც დაფინანსდება, თუკი ისინი ამას მოისურვებენ.

თუმცა, ოჯახის ბიუჯეტში ვიდეოს მიერ შეტანილი წვლილი მხოლოდ აუქციონზე მიღებული თანხით არ შემოიფარგლება. ძმების მამის, ჰოუარდის თქმით, წლების განმავლობაში, ვიდეოს საშუალებით, ჯამში, დაახლოებით, $1,4 მილიონი მიიღეს, თუმცა, ცდილობენ, ცხოვრების წესი არ შეიცვალონ.

"ამ შემოსავლის წყალობით მომხდარი ყველაზე დიდი ცვლილება ჩვენს ცხოვრებაში ალბათ ისაა, რომ ორი ან სამი შვილის ნაცვლად ოთხი გვყავს და ამის შესაძლებლობა გვაქვს", — აღნიშნავს ის.

ფოტო: Caters News Agency

ჰოუარდი ასევე დასძენს, რომ ჰარისა და ჩარლის ყოველთვის ასწავლიდა, რომ მათი ცნობადობა "თავში არ უნდა ავარდნოდათ".

"როცა ისინი გაიზრდებიან, მინდა, რომ ვიდეოზე მეტი გახდნენ", — ამბობს მამა, — "ცნობადობა ცვალებადია, როგორც მოდის, ისე მიდის. ასე რომ, ვიდეოს არასდროს არ ვუყურებდით როგორც პოპულარობის ან შემოსავლის წყაროს".

ასევე იხილეთ: