ჩინეთის ხელისუფლება წყვილებს სამი შვილის ყოლის უფლებას აძლევს, რითაც ორი შვილის მკაცრი პოლიტიკა სრულდება. სახელმწიფო გამოცემა Xinhua წერს, რომ პრეზიდენტმა, სი ძინპინმა გადაწყვეტილება პოლიტბიუროს სხდომაზე მოიწონა.

როგორც BBC აღნიშნავს, ახალი პოლიტიკა მას შემდეგ მიიღეს, რაც ყოველ ათ წელში ერთხელ მოსახლეობის აღწერამ აჩვენა, რომ ჩინეთის მოსახლეობა ბოლო ათი წლის განმავლობაში ყველაზე დაბალი ტემპებით იზრდებოდა.

ამ თვეში გამოქვეყნებული აღწერის თანახმად, ბოლო ერთ წელში 12 მილიონი ბავშვი დაიბადა, რაც 1960-იანი წლების შემდეგ ყველაზე დაბალი მაჩვენებელია.

ჩინეთის ხელისუფლებამ 2016 წელს ოჯახში ერთი ბავშვის ყოლის პოლიტიკა გააუქმა და წყვილებს ორი შვილის ყოლის უფლება მისცა. ამ წელს 18 მილიონი ბავშვი დაიბადა.

"ერთი ოჯახი — ერთი შვილის" პოლიტიკა ჩინეთში 1979 წელს შემოიღეს, რათა მოსახლეობის ზრდის ტემპები შეემცირებინათ. ოჯახები, რომლებიც არღვევდნენ ამ წესს, აწყდებოდნენ როგორც ჯარიმებს, ისე სამსახურის დაკარგვას ან იძულებით აბორტს.